NAPUNO sa kasaulogan ang bulan sa Oktubre. Niadtong Oktubre 6 pormal nga gisugdan dinhi sa Davao ang pagsaulog sa Children's Month nga gidumalahan sa Davao City Council for the Welfare of Children (CWC), ubos ni Konsehal Leah Librado-Yap isip action officer.
Usa ka bulan kini nga kasaulogan aron mahatagan og bili ang pag-ila sa katilingban sa katungod ug kahimtang sa mga batang Pinoy sa atong panahon.
Nag-una ang Davao sa mga siyudad sa tibuok nasud nga anaay kusog nga kalihukan ug programa alang sa mga bata.
Daghan na kining nadawat nga pasidungog sama sa Child-Friendly City sa Pilipinas ug gani daghan ang modayo dinhi aron molantaw kung giunsa pag-atiman sa dakbayan ang mga bata ilabi na kadtong nabiktima sa abuso, pangdaugdaug ug kadtong gibiyaan.
Daghang kalihukan ang gigahin sa CWC karong bulana nga gilusad sa iyang mga miyembro. Karong Oktubre 27-30, pagahimuon ang Mindanao Children's Festival (MCF) didto sa General Santos City.
Unom ka sakop sa CWC nga gikan sa dakbayan sa Davao magpadala og mga bata didto sama sa Bantay Bata 163, Mindanao Migrants Children, Tambayan Center, Kaugmaon Foundation, Lingap Pangkabataan ug Kabataan Consortium.
Mokabat og 300 ka bata ug hamtong ang motambong niini nga gipasiugdahan sa Mindanao Action Group for Children's Rights and Protection (MAGCRP) ilabi na sa ilang lead agency nga mao ang Family Planning Organization of the Philippines (FPOP) SoccksarGen chapter.
Mokabat og 60 ka mga bata ug hamtong nga delegado gikan sa dakbayan sa Davao nga mopartisipar. Gawas niini adunay Research Forum sa Alexan Brothers, "Guhit at Pinta"-Global Day of Action to End all Forms of VAWC, International Day of No Prostitution, Children's Congress, ug uban pa.
Duna pay kalihukan ang mga ahensya sa gobyerno ug ubang pribadong grupo alang sa mga bata nga ilang ilusad nga wala malista sa CWC.
Scouting month usab ang Oktubre busa daghang mga bata nga walay klase ug nag-camping karon. Panahon kini nga mahatagan ang mga bata og panahon nga makig-uban sa ilang mga klasmeyt ug moadto sa lugar halayo sa ilang mga ginikanan.
Dunay mga ginikanan nga dili gusto niini kay basin unsay mahitabo sa ilang mga anak ilabi na kadtong mag-camping sa kalasangan ug halayo nga dapit. Mapaakan daw ang ilang mga anak og insekto nga makawala sa ilang kaguwapo og kaguwapa. Apan para kanako mga oportunidad kini nga molambo pa ang mga bata sa pagkigsandurot sa uban ug sa pagsinati sa kahimtang sa gawas.
Ang panagtapok sa mga bata sama sa camping, festivals ug congress usa usab ka kahigayonan nga mapadayag sa kabataan ang ilang mga katungod, ilabi na sa katungod sa partisipasyon sa mga kalihukan sa katilingban.
Karong tuiga magsaulog usab ang kalibutan sa ika-25 nga anibersaryo sa UN Convention on the Rights of the Child (CRC) busa angayan nang ipangutana natong mga katawhan kung nakabenepisyo ba ang bata sa maong kasabutan.
Gituman ba sa atong gobyerno ang ilang gisaad nga maayong edukasyon, proteksyon, ug mga programa alang sa bata? Mga katungod kini nga dapat singlon sa bata sa atong gobyerno.