NAG-20 ka tuig na ang Sun.Star Superbalita niadtong Oktubre 23. Mao sab ni ang edad sa among kamaguwangan nga si Nikko nga natawo niadtong Mayo 3,1994. Ang Super B nipagawas
sa iyang maiden issue niadtong Oktubre 23, 1994.
Daghan mi og mga bisita sa among anniversary party alang sa mga sources, advertiser ug dealer sa Oakridge Pavillion. Hapit makompleto ang mga konsehal sa Cebu City.
Ningtambong sila si Mayor Mike Rama ug Bise Mayor Edgardo Labella.
Didto ang duha ka biking councilors, Mary Ann de los Santos ug Gerry Carillo. Kay siya ang nagbukas sa South Road Properties alang sa bikers, giduol kong Carillo ug nangutana kon nakabiseklita na ba ko. Ako siyang gisultihan nga wa pa. Sa una sa folding bike nakasikad ko sa may kilid ug gawas sa SRP, apan sa mountain bike wala pa.
Pipila nako ka mga higala, sila si Glenn Chan, Allan Defensor ug Dongdong Sibi nakasikad na. Kaniadto gidili ang pagsikad sulod sa SRP, apan dihang gipabuksan ni Carillo ang dapit, daghan na kaayo ang tigbiseklita. Si Glenn kanunay na magsikaran sa SRP.
Usa sa mga katarungan nga wa pa ko makaanha sa SRP mao ang kakuwang sa oras ug katuyuon. Bacayan ang amoa. Duol ra sa kabukiran nga mas ideal sa mountain biking ug mas makalingaw. Nature lover ko kay nagdaku ko sa bukid. Bukid pa man ning amoa sa una, pero karon puno na sa mga subdivision.
One of these days, mosikad ra ko sa SRP.
Nabaraw
Ang among gikampanya nga bike lane ordinance sa Cebu City medyo nabaraw. Daghan sa mga konsehal ang nagpanagana sa pagpalabang, bisan kon sila nagsuporta, sa ordinansa kay ang atoang mga karsada gidesinyo alang sa motorized nga mga sakyanan.
Gagmay kaayo ang kadaghanan sa mga karsada. Gusto sa mga konsehal nga exclusive bike
lanes ang ibutang aron mas luwas gikan sa mga sakyanan. Husto ang ilang obserbasyon.
Apan mas maayong tun-an nila ang Marikina nga mas gagmay og mga karsada apan dunay bike lanes. Nakaduaw ko sa Marikina earlier this year. Malampuson ang ilang pagpatuman sa bike lanes. Daghan ang mga biseklitang nagsaoysaoy sa karsada.
Nadisiplina ang mga driver kay kon magpataka sila sa pagpadagan, kuyaw silang makadasmag. Kon naay manglabang sa pedestrian lane, manghunong ang mga sakyanan aron makalabang ang mga tawo. Disiplinado sila tungod sa ilang kanhi mayor nga si Bayani Fernando nga estriktong nagpatuman sa balaud.
Makaguol kay diri sa atoa, mahadlok ang mga pulitiko nga mopatuman sa balaud.
Mangindahay kong huna-hunaon sa mga opisyal ang pagpalabang sa ordinansa. Di tanang karsada butangan og bike lanes. Naghatag na mi nila og dapit nga mamahimong butangan og lanes, apan wa tingali nila makita.
Ipalabang
Mangindahay ming mapalabang ang ordinansa aron ang problemahon na lang mao ang pagpatuman. Sa amo nang giingon, andam ming moabag alang sa hapsay ug maayong pagpatuman sa ordinansahon kon mapalabang.
Manghinaut ming malamdagan ang huna-huna sa mga konsehal alang sa kaluwasan sa liboan nga nag bike-to-work matag adlaw. Gikinahanglan ang bike lanes.