HUMAN kapin sa duha ka tuig nga pagpangandam, pagsuwat ug pagduso sa ordinansahon, napalabang na ang “The Tindak Sugbo Lanes Ordinance” ni Konsehal Nida Cabrera sa ilang session niadtong Miyerkules.
Sa iyang paghan-ay sa ordinansahon, iyang gitapok aron kunsultahon ang nagkadaiyang mga organisasyon sa mga biker, labina ang Tindak Sugbo nga nahimong tigtapok sa mga biker nga nagrepresenstar sa lainlaing mga disiplina sa biseklita.
Busa, ang balaudnon nga iyang giduso mugna sa sector sa mga siklista, apil na niadtong naggamit sa biseklita isip inadlaw nga transportasyon. Di kini pinataka ug wa usab gidali-dali pagpanday.
Uyon si Mayor Michael Rama sa ordinansa, busa gipaabot nga iya kining pirmahan.
Sa pagkatinuod, di ang siyudad sa Sugbo maoy una niining bike lanes. Ang siyudad sa Marikina nga mas gamay ug mas gagmay pa og mga karsada dunay bike lanes ug dunay gitukod nga buhatan alang ra gyud niini.
Kon nahimo kini sa Marikina, nganong di man sa dakbayan sa Sugbo?
Tumong sa administrasyong Rama mao ang pagpanindot sa siyudad. Ang pagbutang og bike lanes aron pagdasig sa katawhan sa paggamit sa biseklita isip alternatibong transportasyon usa ka lakang alang sa hustong padulngan.
Kon minos ang mga sakyanan sa kadalanan, mominos ang pulyusyon nga makadaut sa panglawas ug mapugngan ang kadaut sa dagway sa mga estruktura nga manglagom tungod sa aso.
Haum usab kini sa tumong ni Rama sa paghimo sa dakbayan sa Sugbo nga livable ug sustainable.
Ang pagpalabang sa ordinansa maoy sinugdanan sa pagtikang aron ang tanang damgo sa maanindot nga Sugbo makab-ot. Ang ordinansa usa ka bidlisiw sa banagbanag.