Maihap ra tingali ang mga tawo karon nga way Facebook account. Bisan gani mga senior citizen naa man. Ambot kanus-a ko nagsugod aning akong FB account. Dinhi connected ko sa akong mga kabanay, labina tong toa sa layo, mga higala ug uban pa.
Naa koy friends sa FB nga mga pulitiko. Mao nga nakahibawo ko unsay ilang mga kalihukan. Pinaagi sa FB, gipahibawo ko ni Konsehal Nida Cabrera nga for final deliberation niadtong Miyerkules ang Tindak Sugbo bike lane ordinance. Apan wa ko mosaad niya nga makatambong ko kay ang akong mga jersey kinahanglan nakong panglabhan kay taudtaud nang natan-ugan.
Nianang mga pasado alas 12 sa udto niadtong Miyerkules, gitawgan kong Jay Garganera nga giaprobahan ang ordinansa. Pwerte nakong lipaya, apan wa na ko masurprisa kay kahibawo kong uyonan kini base sa akong naobserbahan niadtong public hearing.
Sa pagkatinuod, ang ordinansa wa gidali-dali ni Cabrera pagduso tungod kay gipahigayon pa niya ang daghang mga konsultasyon alang sa mga input nga nahimong unod sa mga probisyon sa ordinansa. Niadtong 2012 pa nagsugod si Konsehal Nida sa pagpaminaw sa mga siklista.
Di dalion
Ang pagbutang og bike lanes dinhi sa dakbayan sa Sugbo di dali-dalion. Gikinahanglan pa kining tun-an og maayo. Bisan tuod kon ang Tindak Sugbo nagduso na og mga karsada nga mahimong butangan og bike lane, apan gikinahanglan pa kining tun-an og maayo. Ang tukuron nga Bike Board maoy motuki niini.
Mas maayo gani, kon dunay lugar ug magasto, tun-an sa board ang gihimo sa ubang mga dapit sa Pilipinas, sama sa Marikina City, nga dunay bike lanes. Giunsa nila pagpatuman ang ilang ordinansa maoy angay nga tun-an, labina kay ang mao nga siyudad mas gagmay og mga karsada kay sa Cebu City.
“We must make it right the first time,” matod pa ni Citom chief Rafael Yap. Wa miy supak niini karon nga nakalabang na ang mao nga ordinansa. Apan lain usab kaayo nga mapupos na lang ang ikaduhang termino ni Mayor Mike Rama, di pa kini masugdan.
Nagpaluyo
Ang nangusog sa kawsa mao ang Tindak Sugbo ug kaalyado niining mga bike organization sama sa Tindak Bisdak Cebu Folding Bike Society, Cebu Fixed Gear, Cebu Extreme Bikers Union ug uban pa. Kon imong tan-awon, kining mao nga mga grupo sagad naa sa leisure ug sports discipline sa biseklita. Apan kining mao nga mga organisasyon wa lang magtan-aw sa kaugalingon, kon di sa kadaghanang nag-bike-to-work. Kanang mga tawo nga naggamit sa biseklita isip alternative transportation sa ilang inadlaw nga trabaho. Daku kaayo ni og natabang kanila sa pagdaginot og kuwarta.
Bisan tuod kon makabenepisyo mi niini, apan ang bike-to-work nga mga siklista ang mas matabangan niini.
Mas makapahimus pa man gani ang mga negusyante ani nga ordinansa kay seguradong mo-boom ang negusyo sa biseklita. Kaming mountain bikers adto man mi sagad sa bukid manikad kay mas malingaw mi kay sa anhi sa patag. Toa ang excitement sa sikad sa bukid, wa sa siyudad.