DIGOS CITY - Mga nagkadaiyang armas ug eksplosibo ang boluntaryong gitahan sa usa ka babaye ngadto sa kapulisan sa alas 12:30 sa udto, Martes.
Ang mga armas ug eksplosibo, sumala pa, gipanag-iyahan sa kapuyo sa babaye.
Si Rowena Sanchez, 21, molupyo sa Barangay Zone 3 ning dakbayan mitahan sa usa ka PRB fragmentation grenade ug mga armas nga Colt MK IV nga paltik, paltik nga kalibre .22 Magnum nga dunay unod nga unom ka buhing bala, usa ka magazine sa kalibre .45 pistola nga adunay unod nga 10 ka buhing bala ug duha ka basiyong bala sa kalibre .45 pistola.
Giila ang kapuyo ni Sanchez nga si Jonathan Romero ug molupyo sa dalang Luna Bataan sa siyudad.
Nasayran nga gitahan ni Romena ang eksplosibo, mga armas ug mga bala human nahadlok sa iyang kinabuhi sanglit kanunay siyang ginahulga ni Jonathan.
Sumala ni Superintendent Querubin Manalang, hepe sa Digos City Police Station gitunol na nila ngadto sa Women and Child Protection Desk si Rowena aron abagan sa pagpasaka og kasong paglapas sa Republic Act 9262 kun Violence against Women and their Children batok kang Jonathan, apil na ang kasong ipasaka sa kapulisan nga illegal possession of firearms and ammunitions.
Gidason ni Manalang nga adunay kasong paglapas sa Presidential Decree 533 kun cattle rustling law si Jonathan apan nakaangkon siya og temporaryong kagawasan dihang nakapiyansa sa Regional Trial Court (RTC) Branch 19.
Hinuon, wa pa nasikop sa kapulisan ang suspek samtang giproteksyonan na sa WCPD si Rowena. (Orlando B. Dinoy)