DAVAO CITY - Usa ka engineer ang nasikpaw sa kapulisan human gilusad ang entrapment operation alas 10:45 sa gabii, Huwebes, sa usa ka motel sa Times Beach, Barangay Matina Aplaya.
Ang suspek mao si Danjo (bansagon gitago), 57, project engineer sa dakong planta sa Panacan ug nagpuyo sa Jacinto Street, Barangay 32-D Pobalcion.
Si Police Chief Inspector Alfredo Santillana, hepe sa Talomo Police Station, nagsaysay sa Sun.Star Superbalita labot sa pagmolistiya sa engineer sa unom ka mga menor de edad nga misumbong kanila.
Nasayran nga makighilawas ang suspek sa mga menor bugti sa kantidad nga P10-mil nga sa ikaduhang higayon mihatag nalang og P2-mil.
Dugang pa sa opisyal nga kung makadala og bag-ong menor nga nag-edad og 14 anyos ngadto sa 11 anyos ang una niyang napahimuslan, mohtag na sab ang suspek og P3-mil sa nag-rekrut.
"Ang iyang gihimo, makig-sex sa 14-year-old paubos, kay di man siya mopatol og kinse pataas. Unang sex mohatag og P10-mil, dugangan niya'g P2-mil sunod sex, pero kung makadala og bag-o nga menor de edad, hatagan niya'g P3-mil ang nag-recruit niini," sulti ni Santillana pinaagi sa telepono.
Human masayran sa kapulisan ang pagmolistiya sa unom ka menor, gilayong mihimog entrapment operation ang kapulisan Talomo uban sa Women and Childrens' Protection Desk (WCPD) gamit ang duha ka menor nga maoy gipaon nila sa suspek.
Nakuha sa iyang posisyon ang P25-mil nga salapi nga pambayad sa biktima.
Lakip nga giimbestigahan sa kapulisan ang clerk ug guwardiya sa motel sanglit gitugotan nila nga mosulod ang suspek nga dunay kauban nga menor de edad.
Gipasaka na kagahapon sa buntag ang kasong paglapas sa Republic Act No. 9208 kun Expanded Anti-Trafficking in Persons Act of 2012.