MAORAG nisaka akong kabuhi nagtan-aw sa pelikulang The Walk.
Usa gyud ni sa akong giatngan salidaha kay naintriga ko nagtan-aw sa trailer pa lang, nga bahin sa usa ka lalaki nga nilatay sa cable wire sa roof top sa Twin Towers sa World Trade Center. Dinhi nimo makita kon unsa kangilngig sa teknolohiya sa Hollywood. Liman ka nabanhaw ang Twin Towers aning salidaha.
Ang pelikula base sa tinuod nga estorya sa French high-wire artist nga si Philippe Petit nga sud sa 45 minutos kawalo nagbalikbalik og latay sa Twin Towers niadtong Agusto 7, 1974. Manlimbawot imong balhibo kay duna pay higayon nga nihigda ug niluhod siya sa cable wire samtang bitbit ang 25-kilogram nga balancing pole. Simba kog masipyat, patay gyud.
Artistic Crime
Laina lagi tan-awon maora kog malipong nagtan-aw sa kahabug sa iyang gilatayan. Liman kag 400 meters above the ground. Ambot giunsa kaha to pag-shooting, maora gyug tinuod. Plano gyud unta nako sa Imax 3D ko motan-aw pero nag-2D ra ko kay sa Amerika kuno ang mga nanan-aw sa 3D naglabad ang ulo ug nagsukasuka paggawas sa sinehan. Dunay say mga giatake sa vertigo.
Unom katuig gitun-an ni Philippe Petit ang construction sa Twin Towers sa wala pa niya gihimo ang gitawag niyang “artistic crime of the century.” Mao tong panahona nga gitukod pa lang ang Twin Towers. Si Petit sa tinuod nga kinabuhi 66-anyos na karon ug dugay nang retirado. Tan-aw mo ani kay talagsaon nga kasinatian ang inyong makita sa The Walk.
Karaoke
Dili lang diay ang ASAP kundi hasta ang mall tour ni Gerald Anderson sa Ayala niadtong Dominggo wa sad madayon tungod sa bagyong Lando.
Pero nadayon ang among presscon pagka- Sabado nga as in nahimong mini karaoke concert. Kay tua man sad sa presscon si Archie “Nene” Marcial (Stars on 45 Grand champion sa It’s Showtime) nga nikanta live sa It Might Be You (with Cebuano lyrics) nga themesong sa pelikulang “Everyday I Love You” nga gibituonan nilang Liza Soberano, Enrique Gil ug Gerald. Game sad nga nikanta si Gerald, hasta si Ms. Josie Pereyra ug Roger Serna nikanta man sad kaha. Ug nahimong karaoke session ang presscon. Wa na lang ko mag-apil-apil kay daghan na tang yabag. Hahaha…
Storyline
Si Maja Salvador gipangutana sa Manila press kon andam ba siyang makatrabaho sa usa ka proyekto ang iyang ex nga si Gerald. Ang tubag ni Maja, “Itanong mo kay Ge (Gerald).” So, akong gipangutana si Gerald. Ang iyang tubag: “Ok lang, magaling namang aktres si Maja. Basta maganda lang yung project, why not?”
Apan dihang akong giingnan si Gerald “what if you, Maja and Kim Chiu in one project?” Nikatawag hilaw ang actor. Apan iyang giklaro nga wala siyay problema basta nindot lang ang storyline. Unsa man nga storyline ang imong gusto Gerald? Wala pa sad kuno siya kahibawo.
Mr. Pastillas
Kadtong si Richard Badajos Parojinog nga nidaug nga Mr. Pastillas sa It’s Showtime niadtong Sabado sa Cebu giintriga nga puwerte kunong sukoa sa girlfriend ato. Aw, duna na diay toy uyab?
“Walay uyab uy,” depensa pa ni Ms. Aida Patana, ang tag-iya sa M. Talent Events and Promotions. “Ako tong ig-agaw, anak to sa board member sa Ozamiz. Iyang papa igsuon sa mayor sa Ozamiz. Bigtime to.”
Dugang ni Patana nga usa kuno si Richard nga mo-guest sa album launching ni Stephanie karong Nov. 14 sa Waterfront Cebu City Hotel.
Samtang apologetic kaayo silang Vice Ganda, Anne Curtis, Billy Crawford, Vhong Navarro ug kaubanan sa It’s Showtime nga niatubang sa mga sakup sa press sa Sugbo tungod sa ka late nilang nangabot sa presscon didto sa Michelangelo Pizzeria sa Banilad. Matod pa nila wala kuno sila magtuo nga hasta diay Cebu grabe na ang traffic. Hirit pa ni Vice, “naloka ako!”