NAGKAMODERNO ang panahon og nagkasensitibo ang tawo sa iyang kahimsog.
Tungod usab kini sa kadaghang sakit nga nikuyanap karon sa atong panahon nga wa na kita kasabot.
Ug ang pinakadakong sakit nga makamatay nagagikan sa lifestyle o pamaagi sa kinabuhi ug dakong bahin niini ang pagkaon.
Mao nga nidako ang industriya sa organic products. Nikusog na gani ang pag-export sa tubig sa lubi nga gihulip sa softdrinks nga kinaham sa mga puti.
Apil nga nikusog ang brown rice ug mga vegetarian nga pagkaon. Hasta ang mga Hapon nangita na'g saging ug prutas gikan sa Pilipinas nga wala mabutangi og kemikal nga pestisidyo ug patubo.
Para kanako haum pa gihapon kadtong aerial spray ban ordinance sa Davao nga hangtud karon wa pa mahukmi sa Korte Suprema kung puwede ba. Dako unta kining tabang sa kahimsog sa katawhan dili lang sa Davao kon dili sa mga lugar nga gipadala ang atong produkto.
Mao nga nikusog ang paggamit og organic fertilizer nga gikan sa iti sa manok ug kabog.
Bisan dinhi sa siyudad, daghan na sab ang nangita'g bugas, prutas ug utanon nga organic.
Naa say mga non-government organizations (NGOs) nga namaligya og organic product sama sa bugas humay, cacao, kape, coco sugar ug uban pa.
Busa dunay gipahigayon nga Organic Congress diha sa dakong mall sa Lanang. Gitawagan ako ni Bebing Abrigana, akong karaang higala nga director sa CARATS, usa ka NGO nga nagduso og mga teknolohiyang inato sama sa organic farming ug paggamit sa biogas.
Motambong siya kauban ang mga grupong nagduso sa organic agriculture sa tibuok nasud.
Kung wa ko masayop, proyekto kini sa Department of Agriculture ug uban pang ahensiya sa gobyerno.
Kung wa pod ko masayop, magsugod kini sa Nobyembre 13 ang product exhibit sa mga imbentor ug innovators sa Davao region nga gi-isponsoran sa Department of Science and Technology.
Daghang mga sakop sa Davao Inventors Association Cooperative (DIACO) ang mosalmot niini diha gihapon sa dakong mall sa Lanang.
Gipakita niining duha ka dagkong kalihukan karong bulana nga buhi ang negusyo dinhi sa Davao.
Dinhi ipakita sa mga imbentor ang ilang kahanas sa pagbaligya sa ilang mga produkto ngadto sa gawas ug nagpasalamat kita nga nisuporta ang atong gobyerno sa ilang paglambo.
Ang organic congress usa ka talagsaong higayon nga mataas ang kahimatngon sa katawhan sa paggamit og inatong produkto nga dili makadaut sa atong lawas.
Panahon usab kini nga mailhan nato kung kinsa ang mga key players ug unsaon pag-apil kanila kung interesado kita. Sa laing bahin, ang exhibit sa mga imbentor nagpakita usab nga daghang mga ideya ug produkto nga gikan sa Davao nga nagkinahanglan sa atong suporta.
Sa laing nasud, dako ang ilang suporta sa mga imbentor aron mahimo kining industriya nga makapadaghan sa trabahante ug mopataas sa ekonomiya sa nasud.
Ngano pa man nga molangyaw pa kung naa ra diri ang suwerte ug dunay tabang sa gobyerno? Busa atua kining suportahan ug unta may sangputanan kining maong kalihuhan.
Happy birthday diay sa among inahan nga si Crisipina Roldan sa iyang ika-89 nga adlaw'ng natawhan didto sa Chicago.