POLIS nga sakop sa Criminal Investigation and Detection Group (CIDG) 7 giakusahang nangilad og kapin sa usa ka milyon sa iyang kaubang mga pulis.
Usa sa mga polis nipasaka og kasong estafa hinungdan nga sia gidakop sa National Bureau of Investigation (NBI 7) human nalutsan og warrant of arrest niadtong Lunes sa hapon mismo sa buhatan sa CIDG 7.
Si PO3 Joseph Villaester, sakop sa CIDG 7 nga nakabase sa Camp Sotero Cabahug sa dan Gorordo dakbayan sa Sugbo, on-duty dihang gipusasan ni NBI 7 supervising agent Rey Villordon ug mga kauban.
Si Villordon nagbitbit sa warrant of arrest nga giisyu ni Judge Wilfredo Fiel Navarro sa Regional Trial Court (RTC 7) Branch 19 sa dakbayan sa Sugbo.
Nakagawas ra siya sa kustodiya sa NBI human nakapiyansa og P40,000.
Si Villaester gikiha og estafa sa iyang kauban nga si SPO1 Arnold Bocayong niadtong Oktubre sa mi-aging tuig human nadala ang iyang P100,000 nga kwarta.
Si Bocayong nadestino na karon sa laing unit sa kapulisan samtang si Villaester nagpabilin sa CIDG 7, diin giingong nakailad sab siya sa iyang mga opisyal ug mga kauban.
Si Bocayong niingon nga siya gipasaligan ni Villaester nga motubo ang iyang kwarta nga i-invest sa non-existent nga financing firm nga sagad nagserbisyo sa mga kustomer sa sugal sa casino.
Giklaro ni Bocayong nga nadala siya sa estorya ni Villaester kay gipasaligan siyang dunay ig-agaw nga nagpautang sa mga sugarol sa Casino.
“I was told that I would earn P18,000 per month, He told me that money can help in my law studies. And if I will become a lawyer, he told me he will get my services,” asoy ni Bocayong sa Sun.Star Cebu.
Gawas sa nadala niyang kwarta gikan kang Bocayong, si Villaester giingong nibulsa sab sa kapin sa usa ka milyon ka pesos gikan sa laing lima nila ka mga kauban sa CIDG-7, nga gilangkuban sa pipila ka mga opisyal ug non-commissioned officers, usa ka abogado, retiradong police ug civilian.
Si Bocayong nibutyag nga duha ka mga police official ningkiha sab kang Villaester human kini kalit nga nahanaw ug ni-absent without official leave dihang nakahibawong gipasakaan og kaso.
Wa siya magduda kang Villaester nga mangilad sanglit kauban sila sa CIDG 7.
Nasagmuyo siya ug naguol kay ang kwarta nga iyang nahatag ni Villaester inutang pa niya sa Armed Forces and Police Savings and Loan Association, Inc.(AFPSLAI).
“I trusted him because we are in the same office and at the same time we are comrades at arms without knowing he already cheated on me,” matod ni Bocayong.
Sumala pa niya nga ang ilang superiors sa CIDG-7 mi-interview sa ig-agaw ni Villaester, apan kini hugtanong nanghimakak nga nagpadagan siyag financing firm.
Ang abogado ni Bocayong nagplano sa pagpasakag laing kaso sa Office of the Deputy Ombudsman for the Military and Other Law Enforcement Offices (MOLEO).
Si Sr. Supt. Richie Posadas, hepe sa CIDG-7 nga nahinabi sa Sun.Star Superbalita, nagkanayon nga si Villaester gi-assign niya sa CIDG-7 Metro Cebu operatives, diin ang hepe niini ang iyang deputy nga si Supt. Fermin Armendarez.
Si Posadas niingon nga nagpaabot siya karon nga mo-report si Villaester kang Armendarez aron iyang maestorya ug makita ang kopya sa release order sa korte.
Matod niya nga gipasakaan niyag kasong administratiba si Villaester human mi-awol ug bag-uhay lang mibalik sa serbisyo human magtago-tago kay gikasuhan sa mga kauban.