Kaniadto wa koy hilig sa Facebook. Apan niadtong 2008, naghimo kog account. Sukad niadto, tagsa ra ang adlaw nga di ko moabli sa akong Facebook aron ma-updated ko sa mga hitabo sa akong palibot. Ang Facebook mi-evolve ngadto sa usa ka platform nga nahimong tinubdan, bisan sa mga balita.
Bisan sa community sa mga cyclist, nahimo na kining abutanan namo. Sa rides, pagpamaligya og biseklita ug parts ug tinubdan sa mga kasayuran labot sa biseklita. Kon gusto kong makahibawo kon nanikad ba ang akong mga higala sa mountain bike discipline, motan-aw ra ko sa ilang Facebook page.
Ang akong mga higala sa folding bike community ako sab makit-an sa Facebook kon diin sila nag-ride. Sila si Edna ug Joel Lee nga founders sa Tindak Sugbo ninggamit sa Facebook sa kampanya alang sa pagpalabang sa bike lane ordinance. Nakatabang kaayo ni og dako sa kampanya namo sa Tindak Sugbo. Naaprobahan gyud ang ordinansa nga giduso ni Konsehal Nida Cabrera. Way bisan usa nga nisupak.
Nakahibawo ang mga konsehal sa benepisyo sa biking. Pangutan-a sila si Konsehal Cabrera, Konsehal Mary Ann de los Santos ug Konsehal Gerry Carillo kon unsay ilang experience nga maayo sa pagbiseklita.
Nag-inusara
Matag Dominggo, kon mosaka ko sa bukid, ako rang usa. Wa una ko mokuyog sa akong mga kauban nga sila si Ramon Villamor, Embet Entice ug uban pa kay kutasan na kog apas. Bisan tuod kon huwaton ko, apan maikog kong maghuna-huna nga akoy nakalangay sa grupo. Usahay magkuyog mi sa akong manghod ug anak, apan kon duna silay mga lakaw, ako rang usa ang motungas.
Dunay mga higayon nga sa Pulangbato ko agi sa pagtungas sa Guba. Duna say sa Binaliw tungas sa Mabini ug una pa moadto sa Brgy. Guba. Kon ikaw di mountain biker ug wa pa makatungas, kining mao nga mga lugar kabukiran ni sa Cebu City. Ang mga karsada ning mao nga mga barangay sumpay sa laing road networks sa Mandaue, Consolacion, Liloan, Compostela ug Danao sa north samtang Balamban ug Toledo sa southwest.
Kaya kaayo nilang Ramon ang pagkuroskuros aning mga dapita. Sa una nga wa pa ko ma-diagnose og mild anemia, sayo kaayong mobangon aron motindak. Busa part aning mga dapita ako nang naadto kuyog sa akong mga higala. Apan ni-slowdown ko pagkahibawo nako nga duna koy anemia. Kuwang pirme sa tulog kay lawom nang gabii mauli gikan sa trabaho, unya momata pag sayo kay motindak aron makakaon og saging gimantikaan sa Willy’s store sa Busay. Pastilan gyud. Bantog rang usahay malipong ko sa una, mao na diay to ang timailhan.
Karon naghinayhinay pa kog balik og sikad. Kon nagtuo kang sayon ang mountain biking, ayaw gyud kay basin wa ka pa makatunga sa biyahe, mokupo-kupo ka sa karsada tungod sa tumang kakapoy.
Preparasyon
Sa biseklita, gikinahanglan ang preparasyon. Di nimo pakalitan ang imong lawas. Sa amo lang night ride sa Tindak Bisdak Cebu Folding Bike Society nga gidumala ni Jay Garganera, sa ako nang giingon, daghan na ang nangakuyapan bisan dug-ol ra ang biyahe nga kon ako ray pasikaron di gani kaabot og usa ka oras.
Sa bisan unsa nga physical activity, gikinahanglan ang hinayhinay nga preparasyon kay kon ikaw makalitan, di maayo ang kasinatian. Basin usa ka sa makuyapan.