COMPOSTELA VALLEY -- Usa ka biyudo ang napiang sa dihang ang katre nga gi-jerjeran sa tambok niyang uyab nahugmak sa alas 10 sa gabii, Dominggo, didto sa Barangay Poblacion, lungsod sa Montevista.

Ang hitabo nasayran sa Sun.Star Superbalita sa dihang naabtan sa tigsuwat ang biyudo uban sa iyang uyab nga tambok nga padung nang mamauli human nga nagpahilot didto sa bay sa usa ka manghihilot nga nailhan sa pangalang Minda sa lungsod sa Compostela.

Sumala pa ni Minda nga ang biktima uban sa iyang uyab nga usa usab ka biyuda kinsa may tumang gidak-on ang lawas naglangga-langga ibabaw sa lantay'ng kawayan sulod sa gamay'ng payag taliwa sa basakan.

Apan kalit lang matud pa nga nahugmak ang lantay hinungdan nga biktima nadat-ugan sa iyang uyab.

"Gabok na daw kuno kadtong katre nga ilang gigamit kay karaan na, asta ang salog sa payag nga gibukbok na, nga tungod sa kabug-at nahugmak," tug-an ni Minda.

Dugang nasayran nga ang biyudo nga nailawman sa iyang uyab dihang nahugmak ang katre, nidiretso sa salog nga gabok, unya ang salog nahugmak sab hinungdan nga milahos sila sa silong sa payag.

Ang manghihilot nagsulti nga ang biyudo nalisa ang tuong bukton ug hawak samtang iyang uyab gasgas ug bun-og sa bukton ug paa sab ang naangkon.

"Maayo gani kay dili ulo nila ang nag-una pagkahulog kon di ang lawas sa biyudo nga niwang mao to nga napiang gyud ang hawak ug maayong pagkadakdak ang sampot," dugang saysay sa manghihilot.

Ang piang sa biyudo, matud pa, maulian ra sa paglabay sa pila ka mga adlaw human nga mahampulan sa mga dahon sa kahoy ug mahaplasan sa lana nga gihatag sa manghihilot.