Hirit: Balaod sa Riding-in-Tandem-Makiangayon ba?

Jesson J. Morata

Lapu-Lapu City

NAGPANDAY karon ang usa sa mga Provincial Board members sa probinsiya sa Sugbo ug lakang nga sa akong tan-aw makasugat og dakong pagsupak sa mga motorist, ilabi na sa mga nanag-iya ug morotsiklo. Tumong sa Riding-in-Tandem Ordinance of Cebu Province ang pagpakgang sa kriminalidad nga naglambigit sa mga nagsakay ug motorsiklo.

Pipila ka semana ang nakalabay sa dihang gihamok ang kapulisan sa mga krimen nga naglambigit sa mga nagsakay og motoriklo. Mga gasoline stations, courier center ug mga convenience shops ang nabiktima sa maong mga nga krimen. Sa pasiunang imbestigayon sa kapulisan, giingong mga local boys ra ang miigo sa maong mga establisimento.

Isip tubag sa maong mga krimen, nagplano karon ang usa sa mga Bokal sa Sugbo nga ipan­day ang sa Riding-in-Tandem Ordinance of Cebu Province. Adunay mga dakbayan didto sa kauluhan nga miimplementar sa ilang mga ordinansa may labot niining mga Riding in Tandem.

Kwestiyonable ang maong balaudnon ug mibahad ang pipila ka mga hugpong sa pagdala sa mga isyu niini ngadto sa Korte Suprema.

Usa sa mga probis­yon sa maong ordinan­sahon nga gidili na ni bisan kinsa mga mosakay ug motorsiklo nga dili tag tungod o paryente. Mamahimo ra nga mosakay ang asawa o ba kaha anak o laing banay sa pamilya. Wala na lang bay mahuna-hunang laing mamahimong mapanday nga balaod? Dili ba kataw-anan, impratika ug madaug-daugon ang maong balaod ngadto sa mga tawo nga motorsiklo lang ilang mapalit isip sakyanan?

Dili ikalimod nga ang motorsiklo maoy main means of transportation ilabi na ngadto sa mga hilit nga lugar nga dili maabot sa mga sakyanan nga upat ang ligid. Mas popular ug naila ang motor, isip habal-habal tungod kay mas paspas kini ug mas dali mga moabot sa destinasyon. Dili lang sa mga bukirang bahin lakip nga gani sa mga kadalanan sa dakbayan sa Sugbo.

Mosalir kaha ang maong balaudnon kon ugaling mapasar kini? Naglisod man gani sa pag­patuman sa mga ba­laod sama sa Helmet Law, kini pa kahang maong ordinansa nga im­praktikal ug kwestiyonable? Hinuon, gitakda karong semanahona ang usa ka public hearing aron makapabuhagay ang mga mahitungdan, ilabi na ang mga tigamitan ug mga motorsiklo sa ilang opinion sa maong giplanong ordinansahon.

Alang nako, dili na kinahanglan ang bag-ong balaodnon aron pagpakgang sa kriminalidad.

Ang higpit nga pagpatuman sa mga balaudnon, police visibility, pagpamabinantayon sa katawhan maoy pipila lang sa mga epektibong lakang pagminus sa kriminalidad nga naglambigit ug mga nagmotorsiklo. Dili tanang mga nagmotorsiklo kriminal.

Mao nga alang nako, maayo unta ang lakang, apan dili maayo ang tumong kay impraktikal kini ug way igong kapasikaran. Aduna pay laing mga angay hatagan ug bili ug dili kining mga lakang nga walay bili.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph