DI LALIM ang usa ka trabaho sa food services industry labi na kung ikaw anaa sa frontline.
Usa niini mao ang trabaho sa usa ka bartender, kinsa mohalubilo sa daghang tawo panahon sa gabii -- sa mga tawo nga kinsa maligdong nga mga kustomer nga daw wa pa nila mahimamat.
Ila-ilahon ta karon ang atong bida kinsa usa sa mga bartender sa Marco Polo Hotel Davao Eagles Bar nga mao si Lawrence Ibarra.
Ang atong bida kinsa tunga sa dekada na sa maong trabaho, nga iya na kining nahanas gikan sa pag-arte ug abilidad niini diha sa iyang mga kliyente ug ang paghatag og kalidad sa serbisyo kanila.
Sumala sa atong bida nga iya kining nasugdan ang maong hilig niadtong nagtungha pa siya sa koliheyo sa Saint Mary's College of Tagum (SMCT) sa Tagum City.
"Na-discover nako akong talent sa bartending 'tong second year college ko. Kang mixing sa mga drinks, later na na nako nahibal-an," sulti niya kinsa miangkon nga nakuha niya ang maong pagka-interesado sa maong butang gikan sa pagdasig sa iyang higala nga bartender sab.
Iyang gidugang nga nagsugod ang iyang pagkahibalo sa flairtending ug bartending sa iyang sayo nga katuigan sa iyang karer, dayon misunod ang pag-usisa sa (mixology) kun ang paghalo-halo sa mga ilimnon.
Giingon niya nga nabaid ang iyang kahibalo sa trabaho di lamang gumikan sa iyang nakat-onan sa eskuwelahan, apan sa iyang makanunayong pagbasa sa nga bag-ong "trends" ug "tricks" sa bartending industry.
Una pa man siya mograduwar sa koliheyo, misulod na siya isip usa sa mga bag-ong bartender sa Doc Noli's Bar sa Tagum City. Iyang professor ang nagpasulod niya sa maong bar kinsa ang tag-iya niini suod nga higala sa iyang maestro.
Siya ang usa sa mga pioneering staff sa maong bar.
"[During that time] I studied at day and worked at night," saysay niya ug iyang gidungag nga motrabaho siya og Huwebes ngadto sa Sabado diin ang iyang pagtrabaho maoy nakadugang kaniya sa kahibalo sa bartending skills.
Nagtrabaho siya sa maong bar dul-an sa usa ka tuig, dayon migraduwar siya sa SMCT sa kursong Hotel and Restaurant Management (HRM) ug mitrabaho isip bellman sa Grand Men Seng Hotel.
Sa tuig 2012, nagsugod siya'g trabaho sa Eagle's Bar sa Marco Polo Hotel, pipila ka mga butang sa iyang palibot maoy nagtudlo kaniya paunsa atubangon ang mga nagkadaiyang estado sa tawo nga mosulod sa maong bar.
Tungod niini, iya pa nga mas gisayud ang mga estratehiya sa pag-mix sa napulo ka mga signature nga mga ilimnon, --sa mong paagi mao sab ang dalan paunsa niya nahimamat ang mga tawo, maka-istorya siya ug masayran ilang hilig.
"It is like building new friends and friendship with the guests," ingon niya.
Giingon sab niya nga gawas sa pag-preparar sa mga ilimnon sa mga bisita, iya sab kining gilingaw sa daghang paagi nga gusto niya sa karaoke night ingon man ang ball rolling.
"I love to see them happy," ingon niya.
Gani, magpabilin atong bida sa iyang oras panahon sa gabii diin mosulod siya sa trabaho alas 4:30 sa hapon hangtud alas 2:00 sa kaadlawon, maabtan pa kini'g alas 3:00 ngadto sa alas 4:00, diin sa iyang day-off, iya gayud nga hatagan og saktong oras ang pagpahuway.
Iya sab nga gipaambit ang panahon nga rest day niya, iyang ihatag iyang oras sa iyang girlfriend ug dunay oras nga moadto siya sa gym aron mag-work out.
Gitan-aw sab niya ang mga katuigan nga motrabaho siya abroad, apan mogahin siya'g lima ka tuig nga mokuha'g culinary aron mahimong chef.
Iyang masulti ngadto sa buot mamahimong mga bartenders, nga di lamang mag-focus sa flairtending kun eksibisyon sa pag-silbi sa mga kustomer ug ang pagpasiga, kon di mo-focus sab sa mixology kun paghalo-halo sa mga ilimnon aron madungagan ang kalami niini diha sa panlasa sa ilang mga kustomer.
"Sabi ko sa kanila wag kayo mag focus diyan (flairtending) kasi hindi naman yan yung binibigay niyo sa guests focus on mixology," tambag niya.
Sama sa bartending diha madiskubrehan ang pinasahe nga lasa sa usa ka ilimnon kung kini imong i-halo-halo ang mga bino, diha sab sa kinabuhi sa tawo nga kung halo-halo na ang batasan nga imong nailhan, kabalo na kita molikay kanila nga di maayo ang tumong ug tinguha diri nato.
Kanimo, Lawrence, saludo kami sa imong kakugi sa trabaho!