ANG team Abu Sayyaf ang mikampeyon sa 2nd AFP-PNP Press Corps Southern Mindanao bowling tournament 2014 didto sa SM Lanang Bowling Center niadtong Sabado sa hapon.
Ang miyembro sa grupo kauban ang magduduwa gikan sa Task Force Davao nagtigi sa tulo ka round.
Ang team Abu Sayyaf nga gilangkuban nila Arnold Calava, Jun Isidro, Roan Abasolo, Shishir Bandhari, ug Paul Palacio ang midaug batok sa laing lima ka tim sa kampeyonato nga dunay kinatibuk-ang 1,800 pinfalls ug nauli nila ang premyong P10,000.
Ikaduha ang team Taliban nga mipaligid og 1,604 pinfalls nga gilangkuban nila Fred Saguran, Peng Aliño, Bing Gonzales, Ruth Palo, ug Efren Elbanbuena nga nakadawat og P7,000.
Ang premyong P5,000 alang sa ikatulong puwesto mao ang Tim Boko Haram nga gidulaan nila Ben Tesiorna, Anne Doble, Rose Bernales, Richy Nalagon ug Ayan Mellejor.
Si Paul Palacio ang midaug sa highest score for male nga dunay 180 pinfalls ug nabulsa ang P1,500 samtang si Ayan Mellejor sa babaye nga miiskor og 145.
Ang kompetisyon gisuportahan nila Antonio "Tonyboy" Floirendo Jr., The Whitehouse Fusion Cuisine and Wine Lounge, Davao del Norte Governor Rodolfo del Rosario, Eastern Mindanao Command of AFP, Davao City Vice Mayor Paolo Duterte, Globe Telecom, Smart Communications, Inc., Pastor Apollo C. Quiboloy, Sr. Supt. Vicente Danao Jr., SM Lanang Premier bowling center, Davao Oriental Governor Corazon Malanyaon, 10th Infantry Division of Philippine Army, Task Force Davao and North Cotabato Governor Lala Taliño-Mendoza. (Ben O. Tesiorna/MSR)