ANG Pasko, selebrasyon nga naghinumdum sa paghimugso sa manluluwas, Hesukristo, usa sa gikahinaman nga kasaulugan, ilabi na sa mga Pinoy.
Mapuno sa mabulukong dekorasyon ang palibot, i-hele ka sa mga maanindot nga Christmas songs, uban pa ang makalingaw nga pagbinay-luay og regalo, tali pamilya, higala, minahal sa kinabuhi.
Ang Pasko sab nagsilbing bag-ong kinabuhi sa kadaghanan, diin matag usa kanato napuno sa paghandum ug panahom nga kini nga adlaw mapuno sa grasya, di lamang alang sa kaugalingon, apan lakip na sa mga tawo sa atong palibot.
Karon, giusa nato ang opinyon sa pipila nato ka mga higala, kung unsa ang Pasko kanila, lakip na ilang wishes.
Alang sa media practitioner ug anchor sa TV5, Gem Avanceña-Arenas, sa tulo ka tuig niyang pagpanarbaho isip media, naandan na niya nga di makauban og Noche Buena uban ang pamilya.
"Murag naanad na ko nga dili mag-Noche Buena. Lisod siya sa sugod kay ningdako ko sa dakong pamilya nga kanunayng mag-uban sa Pasko ug New Year. Nagapaningkamot nalang ko nga inig human sa trabahao, bisan kapoy kayo, makasuroy dayon ko sa ila ug makahatag sa akong mga regalo."
Dugang pa niya: One of the best times of the year gyud para sa akua ang Pasko kay maka-happy nga makita ang kadaghanan nga naglipay-lipay ug naghinatagay og blessings."
Sa sports-minded ug nature lover nga si Angie Maestrado, ang Pasko usa ka pagmaya sa pagkatawo ni Hesukristo.
"Since birthday celebration ni Jesus, panahon para sa pamilya, higala, kalinaw sa kaugalingon. Ang since si Jesus nagrepresent sa pahigugmaay."
Damgo sab niya ang kalinaw sa matag usa.
Pagdayeg sa dakong gugma sa Diyos sa katawhan ang tinuoray nga diwa Pasko.
"Ang pasko alang kanako mao ang pagsaulog sa dakung gugma sa atong Ginoo tungod kay iyang gipadala ang iyang anak nga si Jesus Aron Kita maluwas. Busa ato usab ipabati ang iyang gugma ngadto sa uban pinaagi sa pagminahalay, pagpinasayloay ug paghinatagay," sigun ni Mario Daray, Public Information Officer sa Social Security System (SSS) dinhi sa rehiyon.
Sama sa uban, wish sab ni Daray nga maghari ang gugma alang sa tanang nilalang sa kalibutan.
Ultimate peace ug kalipay sab ang gihamdum ni Kleah Gayle Dublin sa Public Affairs Unit (PAU) Philhealth Regional Office XI.
"Dili lang sa akoa, but sa tanan," dugang niya."
Gidugang ni Dublin nga ang Pasko panahon sab nga mapaambit ang grasya ngadto sa uban, nga maoy tinuoray nga diwa sa Pasko.
Ang Pasko karon nga tuig, mas ispesyal sab alang sa call center supervisor sa Cybercity Teleservices Phil-Davao nga si Lisly May D. Callino.
"I got a lots of blessings this year. Not to mention pa the new bundle of joy na gihatag sa Ginoo, so mao nga special. In return mo-share sab ta og blessings sa uban."
Dugang pa niya, inubanan sa tradisyon nga matag tuig nga tigum uban ang pamilya, simple man kini o engrande, ang importante, napabilin ang tinuoray nga diwa, ang paghinatagay, pagpaambit sa grasya, nakahatag og pahiyum ngadto sa imong isig-kaingon.
Apan kung puno sa hudyaka ang kasaulugan dinhi, sukwahi dinhi ang kasinatian sa mga igsuon natong Overseas Filipino Workers (OFW).
Si Jeff Dizon, usa ka hotel receptionist sa nasud Qatar namahayag nga ordinaryong adlaw lamang ang Pasko sa nasud nga iyang nahimutangan.
"As an OFW Christmas Day is just a like any other day coz I am still working on that day since I am in a country where majority of the people do not celebrate Christmas. And after work I just sleep and as what others say, “This too shall pass.”
Bisan layo sa pamilya, naningkamot gihapon si Dizon nga mapaambit ang kahulugan sa selebrasyon ngadto sa pamilyang nabilin dinhi.
"Since I am an OFW I usually show my love to them by sending gifts .And it will not be complete without them receiving any gifts. Bahala na dili ko kareceive ug any kind of gift basta happy ako family doble na ako mafeel na happiness."
Unsa man ang kahulugan sa Pasko alang kanato, apan sa kinatibuk-an, kita positibong naghandum og kalipay, panaghiusa ug kalinaw sa tagsa-tagsa.
Kini ang tinuod nga diwa sa selebrasyon, nga bisan pa man og naduhig kini sa materyal nga paghinumdum alang sa pipila, apan daghan pa gihapon kanato ang nagsaulog niini sa selebrasyong naandan.