Way rollback sa pamilite: Transmision

ANG transport groups sa Southern Mindanao di manawagan og roll back sa plitehan sa public transportation bisan kanunay miubos ang presyo sa produktong petrolyo sa milabay nga lima ka buwan.

"Wala ta'y plano nga ipa-rollback nato ang pamasahe tungod kay wala pa moabot ang gasolina og P35. Kung mo-rollback siya sa P35, diha siguro maka-plano na mi og rollback," sulti ni Charito Juranes, Transmision/Piston chair, sa pakighinabi sa Sun.Star Davao.

Siya nagsulti nga kasagaran sa ilang mga miyembro naggamit og gasolina samtang dos porsyento lamang kanila migamit og krudo.

Apan, si Juranes nagsulti nga maglaraw sila og rollback sa plitehan, maglusad una sila og pagtuon niini tungod dunay hinanaling pagsaka sa presyo sa petrolyo ug mag-adjust na usab sila sa plitehan.

rBase sa price monitoring sa Department of Energy (DOE) Mindanao Field Office gikan Enero 2, 2014 ngadto Enero 5, 2015, dunay P11.90 ngadto P14.00 nga roll back sa presyo sa unleaded gasoline, nga karon P41.25 ngadto P41.60 sa Enero 5, 2015 gikan sa P53.30 ngadto P55.30 sa Enero 2, 2014 samtang P12.75 ngadto P14 miubos sa premium gasoline, nga karon anaa sa gikan P41.85 ngadto P42.20 gikan sa kanhi presyo nga P54.65 ngadto P55.90.

Dunay P13 ngadto P15.50 nga pagkubos sa presyo sa diesel, nga karon anaa na sa P29.85 ngadto P31.95 kumpara sa kanhi presyo nga P44.90 ngadto 47.40 sa 2014 samtang dunay P6.80 ngadto P16.75 rollback alang sa keronsene, nga karon anaa sa P36.97 ngadto 45.00 gikan sa P51.80 ngadto P55.35.

Sa buwag nga pakighinabi, si DOE Mindanao energy industry management division chief Nilo J. Geroche nagsulti si Sun.Star Davao nga ang rollback sa presyon sa gas tungod sa suplay sa world market nga mireulta sa pagkubos niini.

Suma sa Organization of the Petroleum Exporting Countries (Opec) basket price watch, ang presyo sa petrolyo anaa sa $51.91 per barrel kumpara sa $104.71/barrel niadtong Enero 2014. (Reuel John F. Lumawag),/b>