GIBALHOG sa selda sa San Pedro Police Station ang usa ka 51-anyos nga mister human gipapriso sa iyang asawa nga 60-anyos sanglit nangabit og 23-anyos.
Una niini, mitawag og pulis ang asawa nga si Merlyn, 60, temporaryong nagpuyo sa Barangay 40-D Poblacion, siyudad sa Davao ug lumad nga taga Basak, Lapu-Lapu, Cebu City kay gikulata siya sa iyang bana nga si Reynaldo, 51, construction worker.
Alas 5:45 sa hapon niadtong Huwebes gidala sa presinto dos si Reynaldo ug miangkon sa pasangil sa iyang misis.
"Batan-on bitaw. Alangan naman, layo gud ang Cebu, pero wala gyud mi anak anang 23-anyos nga gikaipon nako karon," ingon ni Reynaldo sa pakighinabi sa Sun.Star SuperBalita Biyernes sa buntag.
Mihilak si Reynaldo nga nahinabi sa SuperBalita tungod iyang nasayran nga pasakaan gyud siya og kaso sa iyang asawa.
"Kasohan man gyud ko ani og RA 9262, pero dawaton nako kay nahimo man nako ni, ug moangkon ko nga tiguwang na akong misis, pero unsaon nga layo kaayo sa Cebu, busa mantinir gyud ko'g batan-on diri," dugang ni Reynaldo.
Nasayran nga sa miaging bulan pa mianhi sa Davao City si Merlyn gumikan iyang nasayran nga dunay laing babaye ang iyang bana.
"Usa pako ka bulan diri sa Barangay 40-D, nag-renta ko'g balay aron panid-an siya, nasakpan gyud nako sa text sa iyang cellphone," sulti ni Merlyn sa tigsuwat.
Saysay ni Merlyn nga suko kaayo iyang bana human iyang maukayan ang sulod sa mensahe sa cellphone niini.
"Gisumbag ko niya diri sa wala nga bahin sa hawak, nilagom, sakit pa kaayo, daghan kaayo akong nahibal-an niya, mao tong nasuko," dugang saysay sa misis.
Biyernes sa buntag, nagdala og kopya sa marriage contract si Merlyn diin giandam na Women and Childrens' Protection Desk (WCPD) sa San Pedro Police ang kasong Republic Act 9262 kun Violation Againts Women and their Children.