PIPILA ka tulog na lang ug moabot na si Pope Francis sa Pilipinas. Akong gisaysay sa niaging hugna sa Nota bene nga unta mas daghan pang Pinoy nga makasaksi sa iyang gibuhat sa iyang pagbisita sama sa pagsaulog sa Santos nga Misa, pagkighimamat sa mga kabus nga biktima sa bagyo, pakigkukabildo sa mga bata ug batan-on, pagduaw sa mga masakiton sa hospital ug uban pa.
Andam na ang tanan hasta ang gobyerno sa pagpanindot sa Quirino Grandstand para sa iyang Misa ug usa ka batalyon nga sundalo ug kapulisan aron maseguro nga way dautang mahitabo sa pangulo sa simbahang Katoliko.
Busa nindot unta kung may big screens sa mga piniling lugar sama sa gym, eskuwelahan ug simbahan aron makasaksi sa iyang pagmisa didto sa Luneta karong Enero 18 ug sa airport sa Tacloban.
Gawas sa mga preparasyon sa iyang pagbisita, atoa sab nga makit-an ang TV appearances sa mga dagkong opisyal sa simbahan sa Pilipinas sama nila ni Luis Antonio Cardinal Tagle, Bishop Emeritus Oscar Cruz ug daghan pa aron matubag ang daghang pangutana sa katawhan kabahin sa bag-ong Santo Papa ug sa iyang paghiabot sa nasud.
Usa sa mga gipangutana mao ang iyang pagka-radikal ug pagkamoderno kuno. Daghang mga tigpaniid nagsulti nga lahi siya sa nangaging Santo Papa kay mas duol siya sa ordinaryong tawo sa iyang yanong paagi sa pagpanginabuhi.
Iya sab nga gibatikos ang sobrang pagpahimulos sa sistemang kapitalismo nga nagpasamot sa kapobrehon sa kalibutan. Giapil niya'g balasa ang estraktura sa Vatican kay naglipang sab daw ang kurapsyon, sobrang burokrasya ug managlahi nga pagpadagan sa polisiya.
Ang iyang gipulihan nga si Pope Benedict XVI niluwat sa iyang pagpamuno sa simbahan luyo sa mga protesta sa hiwing binuhatan sa pipila ka mga Katolikong pari ug Obispo. Apil niini ang karaang tradisyon, baruganan ug kasuguan sama sa paggamit og contraceptives, same sex marriage, homosexuality, married priests, ug uban pa.
Bag-o pa lang, atong nahibal-an nga gibunyagan ni Pope Francis ang anak sa usa ka single parent. Matud pa ni Pope Francis sa pangutana kabahin sa mga Lesbian, Gay, Bisexual, Transgender, Queer (LGBTQ) nga kinsa siya nga mohukom sa ilang binuhatan?
Kung maayong Kristohanon ang paagi sa pagpakabuhi sa mga LGBTQ, nan, way rason nga did-an sila sa pagsulod sa pinuy-anan sa Amahan sa langit.
Dugang pa ni Bishop Cruz nga mas niabli ang simbahan karon sa tanang klase sa tawo. Bisan terorista, killer, rapist, hold-upper ka basta moduol kang Jesus ug mangayo'g pasaylo ug magbag-o sa kinabuhi dawaton sa simbahan.
Ingon sab ni Cardinal Tagle nga pareho lang ang mga pagtulon-an sa simbahan sama sa pagkaabli sa kausaban ug pagdawat sa tanang makasasala sama sa gibuhat ni Jesus, apan managkalahi lang ang paagi sa matag Santo Papa.
Di daw sakto nga tawagong radikal si Pope Francis kay di niya mausab ang mga dinagkong tradisyon sa simbahan sama sa pagminyo sa mga pari ug ordinasyon sa mga babaye aron mahimong pari.
Sa gihapon, gibabagan niini ang deborsyo, same sex marriage, aborsyon, "mercy killing" ug uban pang isyu sa atong bag-ong panahon.