NDAM na ang tanan alang sa Pope Dance sa mga inmate sa Cebu Provincial Detention and Rehabilitation Center agig halad sa pagduaw ni Pope Francis sa Pilipinas.
Atol sa pag-abot sa Santo Papa karong adlawa, himuon sa mga inmate ang ilang pasundayag sa CPDRC quadrangle.
Ilang ipakita ang human cross nga langkuban sa kapin sa 2,000 ka mga inmate ug butangan unya kini sa dakong hulagway ni Pope Francis sa taliwala.
Kini samtang nagtukar ang kanta nga “We Are All God’s Children” nga maoy theme song sa Papal Visit.
Matod ni acting CPDRC warden, Romeo Manansala, imbitado si Gobernador Hilario Davide III ug pipila ka mga pulis-opisyal sa pasundayag sa mga inmate.
Nanghinaot ang mga taga-CPDRC nga mamahimong luwas ug way kakulian ang pagbisita sa Santo Papa dinhi sa nasud.
Samtang isip handumanan sa pagbisita sa Santo Papa dinhi sa nasud, adunay commemorative coin nga gihimo ang Bangko Sentral ng Pilipinas alang sa gusto nga anaay souvenir sa mahinungdanon ug talagsaon nga panghitabo sa Simbahang Katoliko ug sa nasud.
Ang maong coin wa pa naabot sa Sugbo apan gisugdan na paghimo didto sa kaulohan.
Si BSP-Cebu acting director Atty. Leonides Sumbi nga nahinabi sa Sun.Star Superbalita nagkanayon nga wa pa sila mahibaw kon unsaon pagkuha kun pagbaton sa maong limitado nga coins.
Apan matod niya nga nagsugod na paghimo ang ilang central office sa maong coin niadto lang miaging semana.
Adunay duha ka klase ang maong coin diin ang usa nagkantidad og P50 ug P500.
Apan nitataw si Sumbi nga wala kini legal value kun di kini pwede magamit nga pambayad.
Lakip sa gipagawas nga commemorative coin sa BSP ang laing tulo ka coin agi’g pagpahinumdom sa mga bayani ug sa Overseas Filipino Workers.
Usa niana ang Leyte Gulf Landing nga anaay kantidad nga P5 agig pahinumdom sa turning point sa Pilipinas niadtong World War II.
Ang labing ulahai mao ang Apolinario Mabini coin kun ang paghinumdon sa ika-150th year sa mao nga bayani nga nagkantidad og P10.
Lahi sa Papal Visit commemorative coin ang maong mga tulo ka coins nga anaa kini legal value kun pwede magamit nga pambayad apan limitado lang.
Tug-an pa ni Sumbi nga sugod unang semana sa Pebrero makabaton na ang mga Sugboanon niini kay maabot na ang maong coins dinhi sa Sugbo.
Dugang ni Sumbi nga mamahimo nga mag-request sa banko kun sa ilang buhatan sa gusto makabaton sa maong mga talagsaon nga sinsiyo.