Wala tingali wala matandog sa pagbisita sa Santo Papa sa atong nasud, diin nahimo siyang simbolo sa paglaum ug inspirasyon labi na sa mga biktima sa bagyong Yolanda sa Tacloban.
Bisan ako nakatulo ang akong luha nagtan-aw sa mga emosyonal nga talan-awon ug samtang namati sa wali ni Pope Francis Bergoglio kay lagi, matod niya, “If you don’t learn how to cry, you can’t be good Christians.”
HIMAYA
Sa iyang pagtuyok sa nahibiling katuigan sa iyang kinabuhi, prioridad sa Santo Papa nga mahimamat ang mga masakiton ug labing huyang (weakest), labing kabus (poorest) ug mga ordinaryong tawo (least important).
Kon naa ka niining tulo, nan bulahan ka kay haduol ka sa Himaya. Viva El Papa, Viva Francisco!
ROCK STAR
Ang akong namat-an ug idol gyud kaayo nako sa una nga Santo Papa mao si Pope John Paul II. Kahinumdom ko pagbisita ni Pope John Paul sa Sugbo niadtong Sinulog 1981, alas kuwatro pa lang sa sayong buntag nangmata na ming tanan kay excited na makakita sa personal ni Pope John Paul.
Ug karon si Pope Francis na sad nga gipakasama sa “rock star” ang popularidad ug karisma sa mga deboto.
KONTROBERSYAL
Dungan sa pagbiya gahapon ni Pope Francis mao ang pagkabanhaw sa isyung child molestation sa Santo Papa nga gi-post ni Marlene Aguilar sa iyang Facebook.
Tinuod adunay pasangil sa child trafficking ug rape niadtong 1970s nga giatubang si Jorge Mario Bergoglio sa tinuod nga pangan.
Pero tawo ra sad ang Santo Papa ug kinsa ba’y limpyo nato aning kalibutana? Mao bitaw kapila to niya balik-balika, “PLEASE PRAY FOR ME.”
HUBAG
Daghan kong artista ug celebrity nga nahimamat sa miaging Sinulog. Si Tita Annabelle Rama ang kugihan mo-text nako nga niabot kauban ang tibuok pamilyang Gutierrez sakay sa ilang float sa reality show nilang “It Takes Gutz To Be A Gutierrez.”
Ako sad nakachika si Pops Fernandez nga maoy producer sa jampacked Sinulog concert ni Toni Gonzaga sa Waterfront Hotel. Gwapa lang gihapon si Pops ug puwerteng hubaga bisan sa edad nga 48.
AYO-AYO...
Sa nag-angat ang Sinulog, wa nako damha nga makadawat kog masulob-ong text nga nitaliwan na diay si Jessica delos Reyes niadtong Enero 13.
Si Jessica ang mahigalaong desk officer sa Symmetry Fitness Gym sa dalan Borromeo sukad niadtong nailhan pa lang ni nga Perfect Body Gym.
May you rest in peace, Jess. Nakuhaan ang akong mga buotang higala. Akong ipangaliya ang malinawon nimong pagpanaw. Amen.