2 ka balay naugdaw sa sunog sa NegOr

DUMAGUETE CITY - Duha ka managlahing sunog ang nahitabo sa lalawigan sa Negros Oriental diin pulos kini nangaugdaw.

Gikaguol og maayo sa magtiayong John Michael Milan ug asawa niini nga si Rosalie nga adunay usa ka anak nga babaye nga molupyo sa Barangay Combado, lungsod sa Bacong.

Si Michael nga usa ka drayber sa kagamhanang probinsiyal ug ang asawa niini giingong niadto sa eskwelahan sa iyang anak diin siya maoy gitahasan sa pagpaluto.

Nitumbok ang asawa nga ilang naibot ang tanang mga appliances sa wa pa kini nilakaw sa eskwelahan.

Nagdanguyngoy sa paghilak si Rosalie nga nagsud-ong sa naugdaw nga pinuy-anan samtang sa pag-abot sa iyang bana nga si Michael wa kini makatingog sa hitabo.

Gikaguol sa magtiayon nga sud lang sa pipila ka minutos naugdaw ang ilang balay nga ilang gipatuloan og singot aron lang makatukod sa balay.

Laing ilang gikagul-an ang mga importanteng gamit ug mga papeles sa yuta ang naapil og kasunog ug duha ka motorsiklo.

Sumala sa fire marshall sa Bureau of Fire Protection (BFP) sa Bacong nga si FO3 Jerry Gonzales nga sa pagkakaron dugang imbestigasyon ang ilang gipahigayon aron sa pagsuta kon unsa ang hinungdan ingon man danyos sa sunog.

Samtang sa pikas bahin gibana-bana nga moabot P150,000 ang danyos sa sunog nga niigo sa Barangay Piapi diin usa ka karaan nga balay nga gipanag-iya sa usa ka Mariano Rosario, 66, ug molupyo sa naasoyng dapit.

Sumala ni Rosario nga ang iyang balay gipuy-an sa iyang mga ig-agaw nga silang Renaldo Pimentel, Garry Pimentel ug Pedro Rosario.

Matod sa pag-umangkon sa tag-iya sa balay nga si Rosevilla Pimentel nga naglung-ag lang siya alang sa paniudto ug sa dihang iyang gipahinayan ug baga nalang ang nabilin iya kining gibiyaan ug niadto sa silingan.

Milabay ang pila ka minutos gipahibawo nalang siya nga nidilaab na ang kayo sa kusina nga iyang gilung-agan.

Si Dumaguete Fire Marshall Arnulfo Sayson niasoy nga dugang imbestigasyon ang ilang gihimo kon unsa ang hinungdan sa sunog nga iyang gibana-bana nga anaa sa P150,000 ang danyos apil na ang silingan niini nga nakan-an usab sa kayo. (LEJ)