NAGTINGKAGOL sa selda sa San Pedro Police Station ang usa ka ulitawo human giingon nga iyang gihubog dayon gilugos ang 14-anyos nga babaye.
Nahitabo ang insidente alas 6:00 sa gabii niadtong Sabado didto sa Saint John, Barangay 76-A Bucana, siyudad sa Davao.
Gipriso mao si Robert (di tinuod nga pangalan), 18, out-of-school youth, nagpuyo sa nasampit nga dapit.
Sa pakighinabi sa Sun.Star SuperBalita kang Robert, iyang giangkon nga iyang nahilabtan ang pagka-babaye ni alyas Christine, 14.
"Una ato, duha sila, giatangan ko nila sa may Almendras, nisugot man nga mag-inom mi, gihubog sa nako, tapos didto na...," sulti ni Robert.
Giangkon niya nga sinabutan nilang duha ang nahitabo, apan natingala siya nganong gipadakop siya sa pulis.
"Nagsabot man unta mi, pero nitug-an diay siya sa iyang mga barkada, mao nga nasakyan, gipadakop ko nila; rape dayon ang iyang palabas," dugang saysay ni Robert.
Dangtan og usa ka oras, miabot ang kapulisan ug gidakop si Robert aron patubagon sa pasangil sa babaye.
Si Police Officer 1 April Mandi sa Women and Childrens' Protection Desk sa presinto dos maoy nag-andam sa kasong Republic Act 8353 kun Anti-Rape Law of 1997.