NAGKAGULIYANG ang mga ahensiya sa lokal nga gobyerno sa Davao karong bulana tungod sa gihimong "validation" sa "2013 Presidential Search for the Most Child-Friendly Cities in the Country".
Ang uban gipangnerbiyos ug walay tulog kay basin mahiapil ang ilang barangay nga mapiling adtoan sa mga validators nga gikan sa kaulohan.
Nahiapil na usab ang Davao City sa upat ka mga contenders sa "Highly-Urbanized City Category" kauban ang mga siyudad sa Pasig, Cagayan de Oro ug Iloilo.
Tinuig kining maong indigay aron maengganyo ang mga local government units nga maghatag og pagtagad sa katungod ug panginahanglan sa bata.
Aduna kini ganti nga P500 ka libo hangtud sa P1 milyon gikan mismo sa Malacanang ug gidumalahan sa Council for the Welfare of Children (CWC).
Makatulo na ka higayon nga nakadaug ang Davao City sa maong search — ang una niadtong 1998 nga mao sab ang pagsugod niini, ang ikaduha sa 1999 ubos sa pagpamuno ni Mayor Rody Duterte.
Niapil sab ang atong siyudad niadtong 2000 sa panahon ni Mayor Ben de Guzman apan dunay nagprotesta nga mga child rights groups tungod sa panghitabong extrajudicial killings (EJK) sa mga bata nga wala masulbad. Nagkihaay pa gani ang siyudad sa Davao ug ang usa ka NGO didto sa Olongapo City tungod niini.
Kung nakadaug pa unta ang Davao City sa makatulo nga sunod-sunod nga tuig, mahiapil na siya sa "Hall of Fame" ug did-an nang moapil sa sunod nga hugna sa maong indigay. Busa sa daghang katuigan, wala na moapil ang Davao sa maong indigay. Apan sa panahon ni Mayor Inday Sara, naagni ang Davao sa pag-apil na usab ug nasungkit niini ang 2012 Most Child-Friendly City nga gikahinangop kaayo sa mga ahensiya ug mga partner NGOs nga nahilambigit niini.
Dili sayon ang pagdaug sa indigay kay daghan kaayo ang basihan— gikan sa mga balaod para sa bata hangtud na ang budget ug implementasyon sa mga programa, proyekto ug serbisyo sa kagamhanan alang sa bata sa pinakasuok nga barangay.
Busa hasta ang mga barangay nangalisang kay kahibalo ra ba kita nga daghang mga barangay nga sira-sira.
Ang uban wala gani kahibalo kung unsa ang BCPC o ang Barangay Council for the Protection of Children ug ubang balaod alang sa bata.
"Basa-basa sab, Kap," sulti sa mga BNS nga nagkapuliki tawon sa paghimo sa listahan sa ilang mga batang malnuris ug gipangtimbang. Ang upat ka barangay nga gipilian sa mga validators nga adtuon karong tuiga mao ang mga barangay sa Buhangin, 33-D, Binugao ug Tagurano.
Ang 30 porsiyento sa grado pagakuhaon sa mga barangay samtang ang laing 70 porsiyento gikan sa dokumento ug mga programa ug proyekto mismo sa siyudad.
Way problema ang siyudad kay preparado kaayo ang CSSDO, CPDO, CHO, CWC ug ubang ahensiya sa ilang mga datos.
Nakapuntos sab ang siyudad sa daghan niining balaod ug programa nga makatabang sa bata sama sa Anti-Smoking Ordinance, Children's Code, Child Minding Center, Paginhawaan Center, Rehab Center, Day-Care Centers, Mobile Library, Mobile and Barangay Registration Center ug uban pa.
Good luck natong tanan!