Nagkita na sila

SA labing unang higayon, nag­kahimamat sila si Manny Pac­quiao ug Floyd Mayweather Jr. – sa personal.

Gituohan nga tungod niini, mas niamag ang poruhan nga magkrus na gyud ang dalan sa duha ka sikat nga mga boksidor ibabaw sa ring.

Ang duha parehong nag­ling­kod sa courtside nga nag-at­bang sa korte sa duwa sa host Miami Heat ug Milwaukee Bucks kagahapon sa National Basketball Association (NBA).

Sa halftime, niduol si May­weather kang Pacquiao ug nag­la­mano ang duha, nag-estorya og kadiyot dayon nagbinayloay og mga numero sa cellphone.

“He gave his number to me and said we will communicate with each other,” matod ni Pac­quiao, kinsa mitino nga karon pa lang siya nakakita kang May­weather sa sa personal.

Gipangutana kon nagpasabot ba kini nga direkta silang mag­sabot ni Mayweather, si Pacquiao miingon nga mao kini ang ma­hitabo.

Si Mayweather wa mitubag sa pangutana sa usa ka AP reporter.

“Not now,” matod sa usa sa mga security guard ni May­weather.

Kon madayon ang ilang a­way, nalantawan nang daan nga mao kini ang labing dako nga mahitabo sa kasaysayan sa boksing diin gituohang mokita kini og labing ubos $250 million.

Sa miaging buwan, nipa­bu­hagay si Mayweather nga an­dam siyang makig-away sa Pam­ban­sang Kamao sa Pilipinas ka­rong Mayo 2 sa Las Vegas.

Dihang gipangutana kon ma­hitabo ba ang away sa maong petsa, si Pacquiao mitando ug mi­tubag og “yes.”

Sa dihang misulti siya nga gusto siyang makig-away kang Pac­quiao, si Mayweather mitino nga ang promoter sa Pinoy nga si Top Rank boss Bob Arum ma­oy labing dakong babag nga ma­hitabo ang away.

Masaligon sab si May­weather nga iyang malupig si Pacquiao.

“I know that he’s not on my level,” batbat pa ni Mayweather sa miaging buwan.

Sama kang Mayweather, ma­saligon sab kaayo si Pacquiao nga modaog ug mi-tweet kini og “I can easily beat @FloydMayweather, I believe that.”

Sulagmang nagkita

Sulagma lang ang panagkita sa duha ka mga boksidor.

Sulod na sab sa pipila ka mga adlaw nga naa si Pacquiao sa gumikan kay usa siya sa mga nag-judge sa miaging Miss Universe sa Florida International University.

Nakatakda untang mobalik si Pacquiao sa Pilipinas kagahapon apan nakanselar ang iyang flight tungod sa epekto sa winter storm nga grabeng miigo sa New York ug Boston.

Tungod niini, nakadesisyon si Pacquiao nga motan-aw lang una sa duwa sa Heat ug Bucks.

Si Pacquiao mahiligon sab sa basketball ug siya maoy playing coach sa Kia Sorento sa Philippine Basketball Asso­ciation (PBA).

Gawas niini, suod sab silang managhigala ni Fil-am coach Erik Spoelstra sa Heat.

Samtang si Mayweather ka­nunay sab nga magtan-awan sa duwa sa Heat sulod na sa pipila ka mga tuig.

Nagkanayon si Pacquiao nga wa siya magdahom nga mag­kakita sila ni Mayweather.

Hasta ang Heat naghinam­hinam na sab nga mag-away ang duha ka mga boksidor.

Sa halftime, nagbutang sila og hulagway sa duha ka mga boksidor sa ilang video screens nga aduna’y caption nga “Coming in 2015?”

Wa pa gihapon kini klarong tubag ning puntoha. (AP)