NAKAHILAK si Sr. Supt. Conrad Capa nga niasoy sa pait nga gidangatan sa mga sakop sa Special Action Force kon SAF didto sa Maguindanao. Ang iyang gihilakan mao ang pagdagmal nga gihimo sa MILF sa mga nangamatay nga pulis. Matod ni Capa di mapasaylo ang ilang gihimo. Patay na dagmalan pa.
Iyang gipasabot nga ang kamatayon di layo nga mahitabo alang nilang naa sa serbisyo.
Sama sa ubang minatay tukma nga respeto ang gikinahanglan ma-Kristianos ka man o dili. Susamang sentemento ang gipadayag ni Col. Capa atubangan sa mga pulis nga misalmot sa Sympathy Walk nga gipasiugdahan sa Philippine National Police Academy Alumni Association.
Hinuon iyang gidasig ang kapulisan nga taliwala sa nahitabo magpadayon sila sa gipanumpaan nga trabaho. Ug ang lig-on kaayo niya nga pamahayag nga adto nalang sila mobawi sa mga kriminal. Ang buot niya ipasabot nga agi’g pagpasidungog sa nangamatay nilang mga kauban, mao ang pagtinuod sa kampanya pagsikop sa mga kriminal.
Si Supt. Rodolfo Albotra, ang presidente sa PNPA Alumni dinhi sa rehiyon, nanawagan ug patas nga imbestigasyon aron molutaw ang tinuod nga sugilanon sa kamatayon sa maong mga pulis. Si Sr. Supt. Clifford Gairanod magul-anon nga ni-asoy diri nako nga apil sa nangamatay nakauban pa niya sa Tacloban City atol sa pagduaw ni Pope Francis sayo ning buwana. Nakauban sab niya ang uban atol sa gubat sa Zamboanga City. Si Sr. Insp. Verniño Noserale, Class 2009 sa PNPA nitug-an nga ang ilang batch nakahukom pagpatupi ug simi-opaw agig pagsimpatiya sa mga nangamatay nilang klasmet. Nagtan-aw bitaw ko ni Noserale nakaingon ko nga puwerteng bataa pa gyud diay sa mga sakop sa PNPS nga nangamatay.
Taas pa unta sila og maabot diha sa pamulis kung wala pa ang maong insidente. Pila kaha ka buok sa 44 nga nangamatay ang may kahigayon pa nga mabuhi kung wa pa tiwasi.
Mao ni duda sa uban nga posibleng di moabot sa maong gidaghanon kung wa pa tiwasi.
Kadaghan naman ta makasugat ug sugilanon sa mga survivors sa ambush ug engkuwentro dunay maantimano nga mamatay diha-diha dayon.
Dunay matapsingan lang ug molahutay hangtod nga madala sa tambalanan. Pero kung tiwasan ang nagtinga lain na sab ni nga estorya. Di ba sa gubat ang masig habig obligado nga patambalan ang mga samaron.
Dili lagi tiwasan ug labaw nga di among amongan ang mga patay na. Sa pamilya sa mga pulis nga nangamatay atong mga pahasubo. Sa grupo nga gitahasan pag-imbestigar sa dugoong insidente usa ka panghinaot sa mas klaro nga resulta ug matubag ang daghang pangutana ug pagduda.