DAVAO DEL NORTE -- Mismo ang police director sa Davao del Norte Provincial Police Office dili mosalmot sa panawagang "mass leave" sa han-ay sa Philippine National Police Academy (PNPA) Alumni Association.
"Hindi yan magdudulot ng maigi. Wala din namang order yan, boluntaryo ang panawagan nyan," komento ni DDNPPO Police Senior Superintendent Samuel Gadingan dihang nahinabi sa Superbalita sa telepono.
Nag-unang panawagan karon sa han-ay sa PNPA ang mass leave human sa ngilngig nga panghitabong pagkamatay sa 44 ka Special Action Force (SAF) alang sa paspas nga pag-angkon sa hustisya kanila.
"Iniimbestigahan naman yan. Antayin na lang natin ang resulta ng imbestigasyon. Ang tulad ko na may gawaing inaatupag, di naman pwede isantabi na lang ang trabaho. Sino ang papalit? Ang dami pang dapat asikasuhin," dugang pa ni Gadingan.
Kini sab ang gibarugan sa laing PNPA graduate nga si Police Chief Inspector Francis Sonza, hepe sa Davao del Norte Criminal Investigation and Detection and Group (CIDG).
Migraduwar si Sonza niadtong 2003 ug usa sab ka sakop sa SAF.
Gikompirma niini, nga dunay mga gimok sa mass leave pero sanglit boluntaryo man usab ang panawagan ug daghan ang iyang buluhaton, dili siya mosalmot niini.
"Yung ilang araw na mag-leave, naku, kadami ko ng mahuhuli na wanted nyan, marami ng imbestigasyon na mangyari. Maapektuhan yung gawain natin," dason ni Sonza.
Suhestyon usab niini nga huwaton na lamang ang resulta sa imbestigasyon alang sa nahitabo sa "Fallen 44."
"Mas maigi na hindi na tayo magpadala sa emosyon. Malungkot ako sa nangyari sa underclass ko dahil yun ang naging kapalaran nila but they are heroes. Antayin na lang natin ang result ng investigation," dugang ni Sonza.
Ang hepe sa Asuncion Municipal Police Station, Police Chief Inspector Seguido, miangkon nga hinuktukan una niya kon ugaling ang mosalmot sa mass leave.
"Depende talaga yan, Ma'am. May baruganan din naman ako, depende na lang kung paano i-justify ng grupo kung sakali man (na manawagan din ng leave out)," sulti niini sa Superbalita.
Nagsubo man ug nagbangutan ang tibuok kuwerpo sa kapulisan sa probinsiya apan tataw nga ang maong lakang di angay nga salmutan.
Wala man usab sila nanawagan sa uban sa ilang gisakpan nga mosalmot pero sa ilang nahimong baruganan, tino nga dili sila komporme nga biyaan ang ilang gimbuhaton aron ipabilin ang kahapsay ug kalinaw sa ilang tagsa-tagsa ka area of responsibility. (Domilyn Ramos-Pico)