DAVAO CITY - Giingong wa mituman ang pipila ka mga opisyal sa Philippine National Police Academy (PNPA) Alumni Association sa Davao region sa panawagang "mass leave" isip protesta sa nahitabo sa 44 ka mga sakop sa Special Action Force (SAF) didto sa Mamasapano, Maguindanao.
Sumala ni Davao City Police Office (DCPO) director Police Sr. Supt. Vicente D. Danao Jr. nga way kalabutan ang nahitabo sa mga pulis sa Maguindanao nga undangon ang ilang serbisyo ngadto sa katawhan.
Hinuon, giangkon sa ubang opisyal nga naapektuhan sila sa nahitabo, apan dunay laing pamaagi nga makapahinungod og pahasubo sa mga pamilya sa nangamatay.
Giingon sab ni DCPO spokesperson Police Senior Inspector Milgrace Cajes Driz nga nagpabiling anaa sa pagserbisyo ang iyang mga ka-batch sa PNPA.
Dugang ni Driz nga ang ilang kasingkasing anaa nakasentro sa pagserbisyo isip pagtuman sa ilang gipanumpaan sa katawhan. (Jeepy P. Compio)