Nalzaro: Pelikula sa SAF 44

ASA na kaha karon ang banggi-itang movie writer ug director nga si Carlo J. Caparas? Morag wala naman ko makadungog kaniya sa mga balita sa entertainment. Pero dili ta matingala nga karong umaabot nga mga adlaw mikalit lang og motumaw si Carlo J. Caparas og mo-anunsiyo nga mohimo siya og pelikula sa nahitabong Mamasapano, Maguindanao encounter. Si Caparas nabantog nga tighimo og mga true-to-life story sama niadtong Rizal Alih hostage ug Visconde massacre.

Kon mahimoan man kini og pelikula, unsa kahay maayong i-title niini? Fallen 44? The Gallant 44? The heroic 44? SAF 44? Maguindanao Encounter? Ug kinsang estorya sa kinabuhi SAF member i-sentro ang pelikula? Siguro tanan sila hatagan og importansiya sa maong pelikula kay nahimo god silang mga bayani. Kini i-base sa testimonya sa mga nakalingkawas sa maong encounter. Kinsa man usab kaha ang gusto ninyong modala sa ilang mga papel? Una nakong i-rekomendar si Robin Padilla. Maayo ang pagkadala sa papel ni Robin niadtong pelikula nila sa iyang igsoon nga si Rustom Padilla nga “Mistah.” Lalaki pa hinoon si Rustom niadtong higayona. Karon nabayot naman siya. Tanang action stars apilon sa maong pelikula aron mamahimo gyud nga blockbuster. Sama niadtong pelikulang “The Expendables” nga gibituonan sa mga Holywood actors sama nilang Sylvester Stallone, Arnold Schwarzenegger og Bruce Willis og daghan pang uban.

HUSTISYA?

Gisinggit sa mga kabanay sa napatay nga sakop sa PNP-Special Action Force (SAF) ang hustisya. Ilang gihangyo si Pres. Noynoy Aquino nga mohimo og lakang aron mahatagan og hustisya Ang kamatayon sa maong mga SAF members. Dili sa pagbubo og bugnaw nga tubig sa ilang kahigwaos sa pagpangayo og hustisya kay alang nako morag imposible kini nga mahitabo. Kay kon maghisgot god ta og hustisya, ilhon og ikiha ang mga sakop sa MILF nga nahilamgibit sa maong encounter. Pasagdi na lang tong mga BIFF. Kon aduna nay kiha patubagon pod na sila. Tipik og kabahin man ka sa due process. Unya di man gyud na sila motubag busa ipasaka na ngadto sa korte ang kiha.

Unya nalutsan sila og warrant of arrests. Kon duna nay warrant kinsa man kaha usab ang mo-serve sa warrant. Kon dili entiro puwersa sa armed forces og kapulisan ang mo-serve sa warrant, dili basta-basta madakop kanang mga tawhana didto sa ilang teritor­yo. Useless. Gahago-hago lang ning atong gobiyerno paghatag og importansiya aning maong gropo. Dili kana sila sinsero. Kon sinsero pa sila aning peace process nganong wala man sila mosanong sa panawagan sa gobiyerno nga i-pagawas ang pangalan sa ilang mga sakop nga nahilamgibit sa maong encounter og i-uli ang mga armas sa mga napatay nga SAF members og ang ilang mga personal nga gamit nga gikawat sa mga MILF members. Kalimti ninyo nang pagpangita og hustisya kay dili gyud na mahitabo. Ingna ko ninyo og bakakon.

(bobby.nalzaro@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph