NAGPATABANG na sa National Bureau of Investigation (NBI) 7 ang bana niadtong babaye nga namatay sulod sa Mandaue City Hospital human, matod pa, sayop ang gihatag nga tambal ngadto sa pasyente.
Si Cesar Coliflores nidangop na sa NBI aron mapalawman ang imbestigasyon sa kamatayon sa iyang asawa nga si Jocelyn, kinsa gihulagway nga biktima sa medical malpractice sa doktor ug duha ka nurse nga maoy nag-atiman niya.
Wa natagbaw si Coliflores sa resulta sa imbestigasyon sa Department of Health (DOH), ilabi na kay gi-clear niini ang tambalanan sa bisan unsang tulubagon ngadto sa pasyente.
u00a0Matod ni Coliflores, tataw ang mga ebidensiya nga dunay nahimong kalapasan ang Mandaue City Hospital ug daw sa gipakawalay-bili lang kini sa DOH.
Niadtong Pebrero 4 personal nga niadto sa NBI si Mr. Coliflores. Gitambagan siya ni NBI7 Asst. Regional Director, Atty. Dominado Cimafranca pagduso ug formal complain labot sa insidente.
Gipangayuan sab siya sa ahensiya sa kopya sa video nga kuha sa iyang anak, pipila ka gutlo saw a pa namatay ang iyang asawa ug samtang nag-wild kini nga maoy resulta sa sayop nga pag-administer sa iyang tambal.
Wa pa mahibalo ang abogado ni Coliflores nga si Inocencio dela Cerna sa gihimo niyang lakang pagdangop sa NBI. Apan matod niya nga ang maong desisyon, nauyunan nila sa pamilya, ilabi na sa mga igsuon sa iyang asawa.