SA DUHA ka adlaw nga hearing nga gipahigayon sa Senado kabahin sa Mamasapano, Maguindanao encounter, daghang mga tanghaga nga naglimen sa maong hitabo ang natubag. Hinuon, daghan usab nga mga punto ang naghatag og kalibog sa katawhan. May mga punto man gani nga morag mogawas nga gisabong na hinuon ang PNP ug ang AFP.
Kagahapon, nagpahigayon usab og nilahing imbestigasyon ang House of Representatives sa mao gihapon nga isyo. Maburyong na kining mga tag-as nga opisyal sa militar ug kapulisan sa pagtambong niining mga congressional inquiry nga wa ra bay kapa-ingnan.
Migawas nga walay proper coordination ang PNP ngadto sa militar nga nadestino sa Maguindanao sa dihang gipahigayon sa PNP-SAF ang maong high-secret mission pagdakop sa mga terroristang sila si Zulkifli bin Hir alyas Marwan ug kang Basit Usman. Busa way kalibutan ang militar didto.
Ug sa dihang nangayo na og augmentation force ug re-inforcement ang SAF atol sa sinukliay sa mga bala tali kanila ug sa mga sakop sa MILF ug sa BIFF maglisod ang militar sa pagresponde.
Wa sila makapabuto sa ilang mga kanyon kay basin hinuon og ma-igo ang mga SAF members kay wala masayod ang militar sa insaktong location sa mga police commandos. Sa pangutana kon asa man diay ang mga air asset sama sa mga attack helicopters, mi-ingon ang militar nga atoa kini madestino sa dakbayan sa Zamboanga. Miabot tuod ang reinforcement human sa napulo ka oras nga sinukliay sa mga bala ug nahagba na ang 44 ka mga sakop sa SAF.
MAPALPAK
Mirason usab ang kapulisan nga wala sila makig-coordinate sa militar gumikan kay dili sila buot nga mapalpak na usab ang ilang misyon pagsikop sa duha ka nga bomb experts.
Kay niadtong una, nabulabog ang ilang misyon kay mikatap man ang inpormasyon sa dihang ilang gipahibalo ang militar. Busa, migawas karon nga walay pagsalig ang usag-usa kanila.
Atol sa hearing sa Senado wa ang mga tag-as nga opisyal sa MILF. Nagpadala lang kini og mga representante. Pero gusto gyud sa mga senador nga ang mga MILF top leaders ang motambong. Dili ba aduna may contempt power ang Senado? Sayon-sayonon ra man nila ang pagpadakop ug pag-detained nianang mga tawo nga dili motumaw sa ilang hearing? Karong bag-o si Makati Mayor Junjun Binay ilang gipadakop. Ato kunong ipasuway nilag pa-contempt ang mga lider sa MILF. Tan-awon nato og mosaler ba? Unya misaad ang MILF nga ila kunong iuli ang mga armas nga ilang gikawat gikan niadtong mga napatay’ng SAF members. Kaha? Ma i-surender pa siguro nila ang ilang mga asawa kay sa i-uli ang maong mga armas.
(bobby.nalzaro@yahoo.com)