AHENTE og sigarilyo, driver ug helper gipriso sulod sa van sa tulo ka mga tulisan nga nagsakay sa motorsiklo niadtong Martes sa alas 2 sa hapon sa Barangay Lapaz, dakbayan sa Bogo.
Kini nga modus naandan na nga gibuhat sa mga tulisan nga mangigo sa mga delivery van sa nagkadaiyang mga kompaniya.
Way nahimo si Junmar Sanchez, 28, minyo, taga Barangay Tipolo, dakbayan sa Mandaue, salesman sa sigarilyong Mighty Corporation ingon man ang iyang helper nga si Darwin Jugan, 29, minyo, taga Barangay Nailon, dakbayan sa Bogo ug driver nga si Elmer Pilapil, 37, minyo, taga Barangay Kinawahan, San Remegio.
Ang tulo ka mga tulisan nga sakay sa motorsiklo yanong nisakmit sa P40,000 nga halin sa ilang gipangbaligya nga sigarilyo.
Si SPO4 Uswaldo Layson, desk officer sa Bogo Police Station nga nahinabi sa dySS/Sun.Star Superbalita nagkanayon nga nag-deliver og sigarilyo ang mga biktima sa usa ka RR store.
Ningtunga ang mga tulisan, usa niini maoy nition kang Sanchez ug nideklarar og tulis ug gikuha ang P40,000 nga halin samtang ang duha ka kaubang mga tulisan ningtabang, gibunlot ang mga biktima ug gisulod sa van.
Matod ni Layson nga way nahimo ang mga biktima kay nagpasulabi ang ilang kahadlok.
Ang mga residente sa lugar maoy ningtabang sa mga biktima ingon man ningtawag sa kapulisan.
Si Layson niingon nga sa pagkakaron padayon ang ilang imbestigasyon pagsubay sa mga tulisan ingon man sa pagsuta kon wa ba magpakaaron ingnon nga gitulis.
Gipadayag niini nga dunay mga hitabo nga ang mga biktima moaligar nga gitulis apan masuta sa dagan sa imbestigasyon nga “tulis me” ang nahitabo.