Kinahanglan na ang flyover sa Guadalupe? Kini ang pangutana nga angay tutokan sa mga tinugyanan ug mga opisyal.
Kada buntag na lang hangtod sa simbahan ang linya sa mga sakyanan.
***
Akong Kyaw-kyaw tong inyong nabasahan sa niaging Biyernes bisan tuod hulagway ni Timmy Basil ang napatik. Kon suki kang tigbasahan, maklaro nimo nga ako ang tagsulat, di ba?
Nasayop lang pagbutang. Kon sa Tagalog pa, ‘tao lang.’ Anà!
***
Mapagarbohong nipahibalo si Ma’am Rosemarie Gaisano nga ang PBB All-in ex-housemate nga si Joshua Garcia ang iyang celebrity guest sa katapusang adlaw sa Valentines Sale sa Gaisano Main ug Country Mall.
Sa mao usab nga adlaw ang ikaduhang bola sa A Million Thanks raffle promo diin mga dagkong home appliances ug bag-ong sakyanang Mazda ang mga premyo. Gawas sa dagkong diskwento, makadawat usab og lockhearts, Valentines paper bag ug uban pa ang mga mamalitay.
Anha sa Gaisano Main magpasundayag si Joshua sa Dominggo.
***
Gi-forward ni Iris Joy Abarquez sa GMA 7 corpcom group ang mensahe ni German “Kuya Germs” Moreno nga nagpahibalo nga hapit na siya mobalik sa programang Walang Tulugan.
Daghang gipasalamatan si Kuya Germs, una sa tanan ang Ginoo, iyang pamilya, mga bosing sa GMA, mga taga dzBB, mga taga ospital ug uban pa.
***
Ang Cebuanong mag-aawit nga si Von Saw nga inanay nang nailhan dinhi sa Cebu ug mga silingang dapit molunsad sa music video sa iyang bag-ong kanta nga Sa Akong Heart anha sa internet ugma mismo, Peb. 14.
Ang kanta hinimo sa award-winning composer nga si Jude Gitamondoc uban nila ni Medyo Maldito ug Ronald Ensalada ubos sa pagdumala sa FatBoys Productions.
Atong suportahan. Paisano god.
***
Kon hinay mosulti si Aljur Abrenica kon interbyuhon, mas hinay si JM de Guzman. Natakdan pod ang mga taga E-Group gawas namong Dodong Morallo nga medyo layo ang gilingkuran.
Mora lagig naghinagawhaway na lang ang kadaghanan adtong Dominggo sa pagbisita ni JM dinhi aron magpasalamat sa mga nisuporta sa That Thing Called Tadhana.
Nagpasalamat usab si JM sa iyang pamilya nga way puas ang pagsuporta kaniya sa panahon sa kalipay ug kasakit. Nakabasa sab diay si JM sa libro ni Dan Brown nga The Lost Symbol diin didto niya nakuha ang inspirasyon sa usa sa iyang daghang tattoo nga gitawag og circumpunct.
Usa ka gamayng lingin nga giliyokan og dakong lingin ang tattoo. Gihulagway kuno kini ni Angelica Panganiban nga bastos. Di kaha ang iyang hunahuna ang bastos?
***
Sa sunod Lunes, Peb. 23, mobisita sila si Kathryn Bernardo ug Daniel Padilla aron ipagarpar ang ilang bag-ong pelikulang Crazy Beautiful You. Kini gipahibalo sa promo diva nga si Josie Pereyra sa JSP Ads & Promo.
Mopasundayag sila duha sa SM City Cebu inig ka hapon apan sa dili pa, magkukabildo una ming taga E-Group uban nila sa usa ka mabugnawng dapit. Di lang ko mag-tell kon asa kay modugok unya mo. Hehe.
***
Natandog ko samtang nagbasa sa balita nga nipahiyom intawon og bonggang-bongga ang lung cancer patient nga si Jam Sebastian (sa pares nga Jamitch nga nainila sa YouTube kanhi) dihang gibisita ni Vice Ganda sa ospital.
Talandugon si Jam kay stage 4 na ang iyang sakit. Nihangyo na gani kuno kining magpa-mercy killing na lang.
Dalaygon ug sulundon ang gibuhat ni Vice nga paggahin og panahon aron paghatag og kalipay sa masakiton. Saludo ko.
***
Wa ko kauyon sa gibuhat ni Angelica Panganiban nga gihilabtan ang nagpakahilom nga si Shaina Magdayao nga kanhi uyab sa iyang uyab karon nga si John Lloyd Cruz.
Wa gyud ko kakitag rason nganong iya kadtong gibuhat. Sa laing bahin, saludo ko sa tubag ni Shaina nga iyang gidugang sa iyang listahan sa mga ig-aampo si Angelica tungod sa gibuhat niini ngadto kaniya.
Larawan sa usa ka edukada ug Kristohanong linalang.