NIGAHIN ang Kapitolyo og luna alang sa ipatuman nga housing project sa mga kawani sa provincial government.
Nagpadayon karon ang pagpanday og guidelines alang sa pagpili kon kinsa ang makapahimulos niini.
Ang 8.4 ektaryang luna sa Kapitolyo nga anaa mahimutang sa brgy. Tunghaan, lungsod sa Minglanilla, gitan-aw karon nga site alang sa gitinguha nga housing project sa mga empleyado.
Moabot sa 7.3 ektarya ang gitagana alang sa proyekto sanglit ang kapin sa usa ka ektarya nga bahin niini giokupahan naman sa mga benepisaryo sa Gawad Kalinga.
Matod sa labaw sa Provincial General Services Office (PGSO), Jone Sepe, usa sa ilang pipeline project karong tuiga ang paghatag og luna nga kapuy-an sa mga empleyado sa Probinsiya.
Hinuon di pa matumbok sa PGSO kon kinsa nga mga kawani ang makapahimulos niini.
Ila unang tun-an ang posibleng guidelines mahitungod sa maong hisgutanan, ilabi na usab sa paagi sa pagbayad sa luna.
Di pa masulti ni Sepe kon kanus-a magsugod ang gitinguha nga housing project sa mga kawani sa Provincial Government.
Matod niya, si Gob. Hilario Davide III lamang ang makadesidir kon kanus-a kini ipatuman.
Hinuon sa pagkakaron, duna na’y gihimo nga pre-bidding process alang sa maong proyekto.