PAKYAS nga makakuhag klarong tubag ang pamilyang Coliflores gikan sa Mandaue City Hospital labot sa tinuoray nga hinungdan nganong namatay diha sud sa tambalanan ang pasyente nga si Jocelyn sa miaging buwan human kini napainom og tambal.
Ang bana ni Jocelyn nga si Cesar Coliflores uban sa iyang abogado nga si Inocencio dela Cerna ug ang hingtungdang doktor ug mga nars sa tambalanan nagtagbo sa Mandaue City Hall ug gituki ang isyu atubangan ni Mayor Jonas Cortes ug City Legal Officer Giovanni Tianero.
Matod ni Dela Cerna nga dako unta ang ilang panghinaot nga makakuhag tataw nga tubag gikan sa tambalanan labot sa hitabo apan daghang mga pangutana ang wa natubag ug gilikayan sa mga hingtungdan.
Nakakuha sila og impormasyon labot sa giingong pagposas kang Jocelyn dihang nag-wild kini ug sobra sa tulo ka mga tawo ang nagtabang aron siya mapugngan.
Tungod niini, nakadesider na karon si Coliflores nga ipadayon ang pagpasakag kaso batok sa mga personnel nga nalambigit sa giingong medical malpractice. Naismaya siya sa way klarong tubag sa tambalanan.
Gipaabot nalang nila karon ang resulta sa imbestigasyon sa National Bureau of Investigation aron pagsuta kon kinsa ang dunay tulubagon.
Naandam na ni Dela Cerna ang mga affidavit alang sa reklamong homicide nga iduso sa Mandaue City Prosecutor’s Office, medical malpractice ngadto sa Professional Regulations Commission ug grave misconduct sa Ombudsman.