SUKAD nahimugso ang tulo ka probinsiya sa Davao niadtong Hulyo 1967, iya-iya og paningkamot kon kinsa kanila ang molambo ug dagsaon sa mga lokal ug langyaw'ng mga turista.
Unang gobernador sa Davao del Norte mao ang usa ka inilang magsisibya niadtong dekada 60 nga si Verulo "Bert" Bonjong Boiser. Sa Davao del Sur mao si Ramon delo Cientos, ug sa Davao Oriental mao si Leopoldo "Polding" Lopez. Gisundan kini sa uban pang mga gobernador apan hinay ang iyang paglambo.
Sa tulo ka probinsiya, ang DavNor ang nag-una sanglit nahimugso ang laing probinsiya gikan niini ug kini mao ang Compostela Valley Province.
Gawas niini, nahimong siyudad ang Tagum, siyudad sa Samal, ug Panabo City, nga nahitabo niadtong 1998 ug 2001. Karong bag-o nabahin na usab ang Davao del Sur ug kini mao ang Davao Occidental.
Sa lima nga probinsiya karon ang Davao Region, ang DavOr mao ang pinakalayo ug tuyo-unon kaayo kon gusto kang moadto sa lugar, kay mo-travel ka by land og 165 kilometros bag-o ka moabot sa Capital city nga mao ang Mati, ug laing 180 kilometros gikan sa Mati paingon sa Boston, ang katapusang lungsod sa probinsiya nga simpig na sa probinsiya sa Surigao del Sur.
Kon mamaybay ka gikan sa Davao paingon sa lungsod sa Governor Generoso, mo-travel ka gikan sa Davao og 200 kilometros una ka mosangko sa Parola, cape San Agustin lahos sa Barangay Lavigan.
Pero didto sa DavOr, imong makita ang talagsaon nga talan-awon nga dili nimo makita dinhi sa upat ka probinsiya karon sa rehiyon.
Mga beach resort, ug labaw sa tanan ang Mount Hamiguitan nga gisugdan na sa pagtikad nga dagsaon unya sa mga lokal ug langyaw'ng mga turista.
Mao kini ang DavOr karon, sulod na sa 48 ka tuig. Pinakalayo sa lima ka probinsiya gikan sa dakbayan sa Davao, pero nagmalambuon ug dako na og kalahian sulod sa siyam ka tuig ubos sa administrasyon ni Governor Corazon Malanyaon.
Sa lima ka probinsiya, duha lang niini ang matawag nga adunay hari sa politika, o Political Kingpin. Kini ang DavNor nga gikuptan sa mga Del Rosario ug Floirendo.
Ang bag-ong nahimugso nga DavOcc, gikuptan sa mga Bautista.
Ang DavOr, DavSur ug Comval, wala pay na-establisar nga hari sa politika.
Mahibaw-an nato karong eleksiyona sa 2016, kon modaug ang kandidato ni Governor Malanyaon sa DavOr. Sa Comval, kon mapadaug ni Governor Arthur "Chiongkee" Uy ang iyang anak. Sa DavSur, kon mahibalik si Governor Douglas "Dodo" Cagas pagka- governor sa probinsiya.