LEYTE - Nagtingkagol sa selda sa Police Station 1 dakbayan sa Ormoc ang usa ka lalake nga gisikop human giingong nagpailang pulis sa usa ka gasolinahan sa dan Real kagahapong adlawa.
Giila ang suspek nga si Ronald Allan Vicera, 29, lumad sa Naval, nagpailang trabahante sa Procter and Gamble.
Matod ni P/Supt. Ibrahim Jambiran, hepe sa station 1, naobserbaran sa mga kawani sa Shell Gasoline Station ang suspek nga taudtaod nga nag-estambay sa gasolinahan busa gitawagan ang kapulisan sa pagdudang may daotang tuyo ang suspek.
Base sa report sa kapulisan, nagsugod pag-estambay ang suspek alas 9:00 hangtod alas 11:00 sa buntag hinungdan nga nagduda na ang anaa sa gasolinahan.
Sa pagsusi sa kapulisan, nakuha gikan sa suspek ang usa ka Armed Forces and Police Savings and Loan Association Inc. nga ID ug cellphone niini nga gisusi pa sa kapulisan ang sud.
Ang ID nakapangalan sa usa ka Gilbert Esperas, pulis sa Ormoc apan matod sa kapolisan gihimo kini karon nga bodyguard ni Mayor Edward Codilla.
Matod sa suspek nga dunay usa ka ginganlag Helen ang nisugo kaniya nga ipalukat ang play station 3 nga giprenda ngadto kang Esperas nga naa nagtrabaho sa New Capitol sa dakbayan sa Ormoc.
Dugang sa suspek nga gipadala ni Helen ang ID ni Esperas ngadto kaniya kay mao kini ang silbi ‘resibo’ ni Gilbert nga gihatag ngadto kang Helen sa pagprenda sa play station.
Niingon ang suspek nga giadto niya sa New Capitol si Esperas apan wa didto.
Sa dihang gipangutana kon asa dapit ang New Capitol, wa masayod ang suspek basta naa daw sa Ormoc.