SI Architect Jaime Silva gikan sa United Architects of the Philippines nianhi sa Cebu City aron sa paghupot og serye sa pakigpulong ug engagements sa lain-laing venues kabahin sa pagmugna og barrier-free environment alang sa Persons With Disabilities (PWDs) labi na sa mga buta.
Dul-an sa 150 ka tenants, maintenance ug security personnel, administration employees sa SM City Cebu ang nitunga sa panagpulong nga adunay tema nga “Rules on Assisting the Visually-Impaired” sa Conference Room sa maong mall.
Si Silva nga nabuta sa congenital glaucoma niadtong 1982 nipadayon sa iyang pagpangampanya alang sa barrier-free environment alang sa PWDs pinaagi sa pagpakatap sa inpormasyon sa saktong pag-implementar ug pagpalig-on sa Batas Pambansa 344 o The Law on the Mobility of Disabled Persons.
Gipasaka ni Silva ang upat ka sinugdanang punto sa pagtagad sa mga buta:
Una, mao nga atong ibutang sa atong hunahuna nga ang mga buta makahimo gihapon og daghang mga butang pareha sa paglakaw, pagpaminaw, paghikap ug pagsimhot. Ang usa ka buta nga tawo wala ray panan-aw apan normal sa tanang aspeto.
Ikaduha, ang buta dili gusto nga ma “exclude” gikan sa aktibidad sa komunidad. Angayan sab sila nga makakuha og edukasyon, manginabuhi, magminyo ug magsugod og ilang pamilya.
Ikatulo, ang mga buta modawat og bisan unsa nga matang sa pagtabang, ang motabang mas maayo nga buhaton ni sa insaktong pamaagi.
Ikaupat, matod ni Silva nga ang mga makakita dili angay mataha sa pakig interaksiyon sa mga buta.
Dugang pa ni Silva nga ang mga tawo usahay magdahom nga tungod kay buta mi, bungol na sab mi, mao nga ilang pakusgan ang ilang tingog o di ba kaha hinay moistorya.
Si Adela Kono, usa ka accessibility expert ug si Shalaine Lucero, Assistant Regional Director sa Department of Social Welfare and Development nidayeg sa mga programa sa SM City Cebu alang sa PWDs sa pag-ingon nga ang maong mall alang sa tanan. (Abegail L. Alinsug, USJ-R Masscom Intern)