GIREKOMENDAR sa Department of Health (DOH) ang pagpasaka og reklamong medical malpractice ngadto sa Professional Regulation Commission batok sa doktor ug duha ka mga nurse sa Mandaue City Hospital nga nalambigit sa kamatayon sa usa ka babayeng pasyente niadtong Enero.
Gusto sa pamilya sa biktima nga si Jocelyn Coliflores nga maapil sa pagpasaka sa reklamo ang ubang mga staff sa tambalanan, sama sa gwardiya nga nitabang sa paggapos ug pagpakalma sa pasyente dihang nag-wild na kini human nahatagan sa sayop nga tambal.
Si Inocencio dela Cerna, abogado sa bana nga si Cesar Coliflores, maoy nakadawat sa opisyal nga investigation report sa DOH 7 diin usab gitumbok ang rekomendasyon sa ahensiya.
Gawas sa pagpasaka og reklamo ngadto sa PRC, girekomendar sab sa DOH ang pagduso og laing set sa reklamo ngadto sa Mandaue City Government ingn man sa pagpahigayon og re-autopsy sa lawas ni Jocelyn.
Sa report sa DOH, gitambagan sab niini ang Mandaue City Hospital nga mohimo og laboratory test sa ilang pasyente nga anaa sa emergency room ug mohimo sab og usa lang ka discharge summary sa matag pasyente aron kalikayan ang kalibog.
Matod ni Dela Cerna nga gikalipay sa pamilyang Coliflores ang rekomendasyonn sa DOH ug ila na gyung mapadayon ang pagpasaka og pormal nga reklamo batok sa mga hingtungdang medical personnel.
Iduso sab unya sa pamilyang Coliflores ang report sa DOH ngadto sa National Bureau of Investigation nga kasamtangang nihimo og linaing imbestigasyon labot sa insidente.