MIABOT na sa 12 ka tuig ang Acosta Cup, usa ka Dabaw football diin dakong tabang sa mga batang babaye nga magduduwa aron mapalambo ang ilang abilidad.
Kini ang pahayag ni organizer Davao City Councilor Mabel Sunga Acosta atol sa Davao Sportswriters Association (DSA) Forum didto sa SM City Davao Annex niadtong Huwebes.
Matud ni Acosta, ang torneyo nakatabang labina sa non-school-based tim labina sa SOS Children's Village, "Katong mga dili school-based na players, nalipay sila kay naa sila'y opportunity na medevelop ilang skills ug nahimo pud ning incentive for discipline and para magambisyon sila."
Dako sab ang iyang pagtuo nga mihatag kini og kontribusyon sa paglambo nila kinsang mipresenta sa siyudad ug sa nasud sa uban kompetisyon.
Ang 12th Acosta Cup misipa na sayo ning bulana didto sa Tionko Football Grounds diin dunay unom ka tim ang nagtigi.
Sa kasamtangan, ang nanguna mao ang Aguilas Dabaw Football Club nga dunay duha ka daug samtang misunod ang SOYA Football Club.
Ang Philippine College of Technology (PCT)-Khanj ug Punta-DDS mitabla nga dunay rekord 1-1 win-loss ug ang Nakamata Kickers ug University of the Philippines (UP)-Mindanao Football Club wala pay daug.
Karong Nobyembre 7, magkontra ang Nakamata Kickers ug Aguilas ug SOYA batok Punta-DDS.
Mga tropeyo ug medalya naghulat sa mga modaug sa torneyo nga gitugotan sa Davao Football Association (DFA) ug kini gi-isponsoran sa lokal nga panggobyerno sa Dabaw pinaagi sa Sports development division office- City Mayor's Office, Vibrant Earthmovers, Bin Jaime Enterprises, Ulticon Builders Inc. ug RDL Pharmaceutical Laboratory Inc. (Marizz S. Robilla)