TULO ka exsplosibong tres ang nibuto sulod sa XU GYM aron pildehon sa Systems Technology Institute (STI) Olympians ang Southern de Oro Philippines College (SPC) Sharks, 63-59, sa men’s 25-under semifinals sa 2015 Loyola Cup Basketball Tournament niadtong Sabado sa gabii.
Matam-is kini nga pagbalos sa STI gikan sa ilang 58-64 nga kaparotan sa SPC niadtong elimination round.
Nihuman si Norvel Lerio og 16 pts aron mangulo sa Olympians, samtang sila si Joel Solano ug Jonrey Villar nidugang sab og 14 pts ug 10 pts.
Nabiya ang Olympians sa 1st quarter, 10-17, hinungdan sa agresibo nga pick-and-roll ug open shots sa Sharks.
Apan naka-rally kini sa ikaduha nga quarter bisan tuod nga napugos ipalingkod ni assistant coach Stephen “Popong” Dacoco ilang 6-foot-3 nga sentro nga si Mar Marohombsar kay nakaangkon kini sa iyang ikatulo nga personal foul sa 9:07 mins nabilin sa 1st half.
Nasirado ang maong quarter sa 31-all nga ang second stringer ni Dacoco maoy nikayod pagkombati.
Natilawan sa STI ang unang labaw sa dula, 50-48, sa third quarter human sa una nga tres ug puntos ni Villar, nga wala kini nakapuntos sulod sa 28.53 mins gikan sa pagsugod.
Pangpainit pa lang kato tungod nga sigundaan kini niya og siete puntos aron mangulo sa kataposan nga quarter ug gawas niana nilobo ang labaw sa unom ka puntos tungod sa tres ni Lerio sa pagabri sa maong quarter ug nasundan dayon ni Solano og usa sa kataposang 2:40 min sa dula.
Saktosakto ra sab ang pagsulod ni Marombsar sa 4:20 min sa maong quarter diin aduna na kini’y upat ka personal fouls sa 9:20 mins kay nakaabag kini pagprotekta sa labaw ug motapad sa rebounds diin outrebound kasagara ang Olympians batok sa Sharks.
“Nakatsamba ra gyud mi. Nangsulod ang tulo ka tres nga nasustain sa team ang labaw ug wala ko nagdahum nga nidaug sila,” ingon ni Stepehen, anak ni head coach Boy Dacoco nga karon nagcoach sa iyang Sacred Heart of Jesus Montessori Highschool (SHJMHS) sa National Basketball Training Center (NBTC) sa Kaulohan.
Sila si Jonathan Felisilda ug Shawn Michael Recabo nangulo sa Sharks nga adunay 14 puntos matag usa.
Sa finals, magatbang Olympians ug ang Xavier University (XU) Crusaders, nga mipilde sa Lourdes College, 79-67, sa una nga dula sa men’s semifinals.
Ang game one gidula kagahapon sa gabie sa XU GYM. Nakaginhawa ang Crusaders ni coach Rocky Calingin sa higpit nga panagkombati sa una nga half sa dula. Nakalabaw ang Lourdes sa una nga quarter,16-12, hangtod nga natabla sa ikaduha, 30-30.
Nag-asoaso kini si Crusader Rhodelle Nagac nga nipaboto og 13 sa iyang 24 puntos sa 2nd half aron matilawan ang labaw ug nidako pa og samot hangtod sa paghuman.
Sayang sab ang opensiba ni John Mark Bahian sa Lourdes sa third quarter apil na nga wala niya napasulod ang upat sa unom ka free throw.
Gawas niana, ang Lourdes nihatag og lima ka krusyal nga turnovers. Nihuman siya og 15 pts samtang si John Elizer Pacana niabag og 11 pts.