WAY mga kamot ug mga tiil si Grace Escrupolo.
Apan bisan sa kakulian sa panglawas, wa kini makababag sa 22 anyos nga dalaga sa iyang inadlaw-adlaw nga mga gimbuhaton.
Si Grace, taga barangay Guadalupe, dakbayan sa Sugbo, gigrasyahan og mga talento sa pagdibuho, pagkanta ug pagpinta.
Bisan og way mga kamot ug mga tiil, maayo siya mo-drawing.
Gani, nalangkat niya ang unang dapit sa labing nindot naka-drawing atol sa Cebu Art Festival and Competition nga gipahigayon sa Kapitolyo niadtong Huwebes sa niaging semana.
Ang kalihokan gipasiugdahan sa Korean Philippine Cultural and Educational Exchange Center (Kopec), pagsaulog sa 9th Anniversary Disability Day, nga nagpakita ug nag-ila sa creativity sa kabataan nga dunay mga kakulian sa panglawas.
Sa pag-drawing, ang lapis sipitan ni Grace sa iyang tuo nga pulso ug wala nga braso dayon magsugod og sketch hangtod nga maporma ang hulagway nga buot niya i-drawing.
Ang larawan nga nagpakita sa usa ka batang gamay nga gigakos sa iyang amahan ug inahan ug adunay dako nga kasingkasing sa ilang luyo ang gidibuho ni Grace nga maoy nidaug sa kompetisyon.
Mga larawan sa payag, umahan, bukid, mga kahoy, utanon ug mga prutas ang hilig niya nga i-drawing.
Sa iyang talento sa drawing, mikita na si Grace gumikan kay ang kaila niini nga mga tinun-an nga magpa-drawing, mosuhol niya ug ang kwarta iyahang ihatag sa iyang inahan.
Naila usab si Grace nga usa ka maayo nga mangaawit ug nakakanta na kini sa dagkong mga mall ug ubang mga lugar sa Sugbo.
Paborito niya nga mga singer sila si Celine Dion, Mariah Carey ug Regine Velasquez.
Gawas niini, mokita usab siya sa paghimo og projects ug pag-tutor sa mga estudyante.
Si Marciana Gabutan, maestra ni Grace, nihulagway niini nga usa ka utokan ug talented nga tinun-an ubos sa home-bound program sa Department of Education sa Lipata National High School Special Education Center sa lungsod sa Minglanilla.
Matod ni Gabutan paborito nga subjects ni Grace ang Math ug Filipino.
Pangandoy ni Grace nga mahimo nga usa ka computer engineer.
“Dili maghunahuna og bati. Think positive lang gyud. Dili maghunahuna nga down sila para happy sila pirme,” mensahe niini ngadto sa mga tawo nga adunay susama og kondisyon niya.
Si Victoria Escrupolo, inahan ni Grace, niingon nga Orthopedically Handicapped (OH) ang kondisyon sa iyang anak.
Siya niasoy nga sa dihang nagsabak pa kini ni Grace gihilantan siya ug nagsakit og German measles.
Matod niya nga operahan na unta siya aron kuhaon si Grace sud sa iyang sabakan human wala na kini molihok ug mopitik ang kasingkasing dihang gi-ultrasound siya upat ka buwan pa lang ang iyang tiyan.
Apan ang iyang bana wa mosugot gumikan kay babaye ang gisabak niini.
Pagbalik og ultrasound lima ka buwan na ang iyang tiyan, aduna nay heartbeat ang bata hangtod nga kini nahimugso niadtong Oktubre 17, 1992, diin suhi kini dihang gipanganak.
Ang apohan nga lalake nga si Alfredo, ang naghingalan sa bata og Grace gumikan kay alang nila grasya kini gikan sa langit.
Si Victoria nihulagway ni Grace nga kugihan ug matinabangon sa ilang pamilya. Motabang kini sa gimbuhaton sa balay sama sa pagluto, paglaba, pagpanglimpiyo, pagpanilhig ug bisan ang pagbantay sa pag-umangkon niini.
Ang 45 anyos nga ginang niawhag sa mga ginikanan nga paeskwelahon ang mga anak nga dunay mga kakulian sa lawas. Dili kini ikauwaw, panggaon ug mahalon sanglit gasa kini gikan sa Ginuo.
“Dapat mo-support sila sa ilang mga anak, atimanon nila. Bisan og dunay deperensiya, dili nila pasagdan aron makaingon ilang mga anak gigam sila,” awhag ni Grace sa mga ginikanan.
Si Victoria namahayag nga gihatagan unta og prosthetics nga mga tiil si Grace, apan mas gipili niini ang paglakaw gamit ang iyang duha ka mga tuhod nga gikubalan na.