NAANGKON sa Systems Technology Institute ang Game One human sa ilang 79-75 kulbahinam nga kadaogan batok Xavier University sa ilang best-of-three finals sa 2015 Loyola Cup Men’s 25-under Interschool Basketball Tournament niadtong Domingo sa XU GYM.
Halos susama ang kadaogan sa STI Olympians batok sa Southern de Oro Philippines College sa semifinals niadtong Sabado nga diin naglakag sila sa biya ug nilampos sa kataposan nga half.
Napanas sa Olympians ilang 16-point nga biya sa 3rd quarter human sa offensive breaks nga gipangulohan ni Joel Sollano nga nihuman og 21 points sa dula.
Apan dako og abag si Emmanuel Akut sa backcourt ug inside-the-paint nga opensiba nga nibira og siete sa iyang 12 puntos sa maong quarter.
Nidugang sab sila Mar Marohombsar ug duha ka tres gikan nila ni Jonrey Villar ug Norvel Lerio aron taposon ang 3rd quarter sa 62-61 nga biya.
“License to shoot. Pass to the open man and shoot,” mando ni coach Stephen “Popong” Dacoco sa iyang mga Olympians.
Sa dihang pagabri sa kataposan nga quarter, nagbinayloay ang Olympians ug ang XU Crusaders sa usa ka ‘seesaw’ nga panagkombati.
Naglisod og pugong ang Olympians sa opensiba nila ni Rhodelle Nagac ug Red Cachuela.
Samtang ang tres ni Sollano sa kataposang period nipainat og upat ka puntos nga labaw, 69-65, para sa Olympians.
Nisulay sila si Nagac ug Cachuela pagapas sa puntos apan si Akut nipahuman dula aron isilyo ang kadaogan sa Olympians human nga nalugaran siya sa backboard ug sa fastbreak gikan crossover pass ni Villars a 8 sec nabilin sa kataposan nga half.
Sa pikas bahin, hapit pa nahimong kontrobersyal ang Game One tungod nga nasayop og plastar ang skor sa STI nga imbes 65-64, nalakra sa STI 66-63 gikan sa lay-up ni Sollano.
Hinoon, dos puntos lang man ang deperensya.
Usa sa coaching bench sa XU nireklamo sa dihang kamulo pa ang dula sa Segundo oras nabilin.