NIDUSO na og pormal nga reklamo ngadto sa National Bureau of Investigation (NBI) 7 ang pamilya niadtong babayeng pasyente nga namatay sulod sa Mandaue City Hospital, human matod pa, nahatagan sa sayop nga tambal.
Hinuon di pa ni mahimong maduso sa piskaliya ug paabuton pa ang resulta sa re-autopsy sa patay’ng lawas sa biktima.
Human nakaduso og request for investigation ngadto sa NBI7 sa miaging buwan, si Cesar Coliflores, bana sa namatay’ng pasyente nga si Jocelyn, pormal nga reklamo na ang iyang gipadangat ngadto sa ahensiya.
Ang reklamo ni Mr. Coliflores iyang gitumong batok sa mga doktor ug duha ka mga nurse sa Mandaue City Hospital nga maoy giingong ni-administer sa tambal sa iyang asawa, apan giingong sayop, hinungdan sa kamatayon niini.
Lakip sa gireklamo ang usa ka gwardiya nga giingong nitabang sa pag-gaid sa pasyente dihang nag-wild na kini, human usab masinati ang laing epekto sa tambal diha sa iyang lawas.
Gitug-an ni Atty. Hazan Bargamento, nga lakip sa mga ebidensiya nga mopalig-on sa reklamo ni Mr. Coliflores batok sa mga personnel sa tambalanan mao ang resulta sa imbestigasyon sa Department of Health, diin usab girekomendar ang pagpasaka ug reklamong medical malpractice batok sa mga hingtungdan.
Bisan ug nakaduso na og pormal nga reklamo sa NBI si Mr. Coliflores niadtong Enero 2, gipasabot ni Atty. Bargamento nga dili pa ni mahimong isang-at ngadto sa piskaliya o sa Professional Regulation Commission.
Kini tungod kay gipaabot paman nga mahuman ang imbestigasyon sa maong ahensiya labot sa hitabo ug ang resulta sa gihimo niini nga re-autopsy sa patay’ng lawas sa biktima.