MIGAWAS na gyud ang kamatuuran kabahin sa Mamasapano, Maguindanao encounter. Kini human gipagawas sa Philippine National Police (PNP) Board of Inquiry (BOI) ang ilang report kabahin sa encounter nga nahitabo tali sa PNP-Special Action Force (SAF) ug mga sakop sa Moro Islamic Liberation Front (MILF) ug Bangsamoro Islamic Freedom Fighter (BIFF) niadtong Enero 25, diin 44 ka mga SAF commandos ang napatay. Dili diay mga MILF ug BIFF ang nagpapatay sa mga SAF members kon dili NPA. Yes, NPA ang nagpapatay sa SAF 44. Napenas, Purisima, Aquino (NPA). Bwwahhhh, pagkatoytoy!
****
Seryoso ta uy. Nasuta sa BOI nga daghang palpak ang Operation Exodus sa tumong nga pagkuha ug pagsikop sa international terrorist nga si Zulkifle Bin Hir alyas Marwan ug ang luyo-luyo niini nga si Basit Usman. Matod sa findings sa BOI nga sukad sa sinugdanan, gikan sa pagplano ug pag-execute sa maong oplan, depektuso na kining daan. Gibuak ang chain of command sa PNP, walay klarong direktiba sa mga tropa nga misulod sa teritoryo sa MILF, walay klarong komunikasyon ug walay koordinasyon sa militar ug GRL-MILF ceasefire committee. Bisan ang mga armas sa SAF mga depektoso kuno.
Chain of Command
Matod sa BOI findings nga wala masunod ang chain of command sa PNP gumikan kay wala nila pahibaw-a si acting PNP Chief deputy Director General Leonardo Espina. Bisan si Interior and Local Government Sec. Mar Roxas. Ang nahibawo lang sa maong Oplan mao sila si Presidente Aquino, suspended PNP chief Alan Purisima, SAF commander Director Getulio Napenas ug ang usa ka PNP intelligence officer. Gikuwestiyon gyud sa BOI ang papel ni Purisima nga nganong nag-apil-apil siya nga suspendido naman unta siya.
Ang angay untang pangutan-on aning puntuha mao si PNoy. Nganong iya pa man nga gitugutan si Purisima nga moapil sa pagplano sa Oplan Exodus?
Gumikan kay suod sila o gumikan sa iyang sobrang pagsalig sa heneral? Dili man pod nato mabasol si Purisima nga mi-apil kon wala siya awhaga o mando-i sa Presidente. Karon si Napenas na hinuon ang gidakdakan sa tanan. Gipasanginlan pa siya sa Presidente nga milingka kaniya. Kon aduna may tawo nga naglingla sa Presidente, way lain mao si Purisima.
Kon ikaw si Napenas, dili ka motuo sa mando ni Purisima nga ang iyang mando mao may mando sa Presidente? Nahibawo god ang Presidente sa tanan. Unya karon dili mo-angkon si PNoy sa iyang responsibilidad?
May rason
May rason baya pod si Napenas nga wala makig-coordinate sa military sa maong lugar og labi na gyud sa GRP-MILF ceasefire committe. Kay kon iya kanang himoon, mabulilyaso na usab ang maong mission. Kay nagtuo kaha mo nga dili mo-leak ang impormasyon kon ilang gipahibalo ang taga MILF? Toa god si Marwan sa ilang teritoryo. Bisan anino ni Marwan wala na silay maabtan. Ambot og usay sangputanan ning tanan? (bobby.nalzaro@yahoo.com)