NABASLAN sa host Xavier University ang Systems Technology Institute paagi sa 109-79 nga kadaogan sa Game two niadtong Sabado aron mapugos og do-or-die nga Game Three sa Men’s 25-under finals sa 2015 Loyola Cup Basketball Tournament.
Gigamit sa XU Crusaders ni coach Rocky Calingin ang usa ka game plan nga dula sa Misamis Oriental Communicators sa manghod ni Rocky nga si Andy kontra Ricnobs Horizon ni coach Boy Dacoco sa 2003 finals sa kanhi Oro Basketball League (OBL).
Nag-switching ang pirmiro ug ikaduha nga stringers sa Crusaders aron lang mautro ang dagan sa dula.
Tuod, wala niepekto diretso ang game plan sa XU batok sa STI Olympians sa una nga half tungod sa di mapugngan nga atake nila ni Joel Sollano ug Norvel Lerio.
Napanas sa Olympians ang walo ka puntos nga deficit sa ikaduha sa pagpangulo ni Sollano nga nibira og 17 sa iyang 23 pts apil na ang tulo ka tres sa ikaduha nga quarter.
Nahuman ang unang katunga sa dula sa 44-42 nga lamang sa Crusaders.
Parehas gihapon ang gigamit sa XU sa pagabri sa ikatulo nga quarter ug mas nilig-on pa ang ilang depensa.
Didto na nabyaan ang Olympians sa pagsulod sa second stringers sa XU sa 6:52 mins sa third quarter nga gipangulohan ni freshman rookie Glen Gallardo ug Dan “Dodan” Lagbas.
Gisamotan na sad og maayo sa pagbalik sa first five sa 3:24 mins nga gipangulohan ni Rhodelle Nagac nga nipaboto og 15 sa iyang 23 pts sa maong quarter.
Gawas sab, nadepensaan og maayo sa Crusaders ang mga atake sa Olympians sa ibabaw paagi sa trapping ug full-court press.
Nahuman ang 3rd quarter sa 79-54 nga labaw sa XU.
Hangtod sa kataposan nga quarter, wala nakatubag ang Olympians nga diin nisamot pa kini og labaw hangtod sa 30 puntos.
“We simply lost to a better team today but we will try in the last Game. Siguro kulang lang og motivation but the talent is there,” ingon ni coach Stephen “Popong” Dacoco.
Naobserbahan pod ni Tournament Manager Dindo Escobido nga ang "switching" nga game plan sa Crusaders nakahatag og kakapoy sa Olympians.
“Morag gipangkapoy ang first-five sa STI,” ingon ni Escobido.
Game Three gipahigayon kagahapon.
Sa pikas bahin, naangkon sa Lourdes College ang ikatulo nga puwesto human nila napanitan ang Southern de Oro Philippines College (SPC), 66-63.