NAANGKON sa Xavier University (XU) ang kampyonato human sa ilang kulbahinam nga 76-73 nga kadaogan batok sa System Technology Institute, 76-73, sa kataposang Game Three finals sa 2015 Loyola Cup basketball Tournament, nga nahuman niadtong Domingo sa gabie didto sa XU GYM.
Imbes natambalan na sa STI Olympians ang suliran sa ilang kapildehan niadtong Game Two, nakapahimulos na hinoon ang XU Crusaders sa kaluya sa low post ug inside the paints.
Nahurot ang personal foul ni 6-foot-3 bigman Mar Marohombsar sa Olympians sa kataposang 2:05 mins nabilin sa dula nga makahatag unta kini siya og intimidasyon ug depensa sulod.
“Nang-gigil si Mar kay taas kaayo ang intensity sa dula, morag nisabay siya sa crowd,” ingon ni STI coach Stephen “Popong” Dacoco mahitungod sa kataposang foul ni Marohombsar nga nahatag niya kang Dodan Lagbas sa 69-67 ng labaw sa XU.
Nibinat og lima ka puntos nga labaw ang XU, 73-68, pinaage sa duha ka freethrow ni Lagbas gikan sa foul nga nahatag ni Marohombsar ug nasegundaan pa sa iyang lay-up.
Apan, naglanog ang tingog sa mga STI fans human nipaboto si Joel Sollano og tres sa 54 sec nabilin aron modikit ang biya sa duha ka puntos, 73-71.
Nidikit pa gyud kini sa usa nalang ka biya sa Olympians, 74-73, human nasulod ni Emmanuel Akut ang duha ka freethrow sa 19 sec nabilin. Human sa inbound, gipanigurado sa XU nga huroton ang oras aron masilyo ang s
kadaogan.
Tungod niana, dugay nihatag ang STI og foul nga nikabat sa pito nalang ka segundos nabilin diin si Akut ang nakahatag batok kang Red Cachuela.
Tanan teams anaa na sa penalty, napasulod ni Cachuela ang duha ka freethrow.
Si Cachuela, nga ginganlan sa torneyo nga Most Valuable Player, nihuman og 13 pts samtang si Rhodelle Nagac nga konsister sa pagpangulo sa XU nibira og 21 pts.
Natambalan sa Olympians ang ‘switching’ game plan ni XU coach Rocky Calingin.
Wala lang gipatumpang ni coach Dacoco iyang mga starters hinungdan sa kapildehan nila sa Game Two diin girakrakan sila sa kataposan nga half.
“Amo lang sa gipapahulay kadyot mga starters namo para makapondo og kusog sa endgame,” ingon ni Dacoco. Problema lang sa Olympians, si Norvel Lerio, nga kanunay kini nihatag og dako nga kontribyusyon sa ilang mga dula, nihatag lang og pito ka puntos ug nilakra lang og usa ka tres sa walo niya nga "attempt."
“Mora man molihay ang ring da,” ingon ni Lerio.
Si Sollano nangulo sa STI nga adunay 25 pts nga sulod niana ang yang lima ka tres sa siyam ka attempt.
Tulo sab ka sunod-sunod nga tres iyang napasulod sa 2nd quarter. Gawas ni Cachuela, sila si Nagac, Lagbas, Lerio ug Sollano nanganlan mga “Mythical Five” sa Men’s 25-under.