ANG Traffic Enforcement Agency of Mandaue (Team) nagplano sa pagbutang og bike lane sa may SB Cabahug aron di makapatuyang ang mga driver sa pagpadagan sa ilang mga sakyanan.
Nabantayan sa Team nga sukad gipatuman ang one-way scheme sa dagkong mga karsada sa siyudad, nagpatuyang ang mga driver kay luag na kuno ang dalan. Mag-crisscross sa mga lane ang mga driver nga kuyaw na hinuon sa aksidente.
Kon dayunon sa Team ang plano, mag-una pa ang Mandaue City sa Siyudad sa Sugbo sa pagbutang og bike lane. Mahimong kataw-anan ang Siyudad sa Sugbo kay naa na tuoy Sugbo Bike Lane Ordinance, apan kutob ra usab sa papel.
Apan solusyon ba sa pagkontrolar sa dagan sa mga sakyanan ang pagbutang og bike lane? Unya kay eksperimento ra man ni, kon mapalpak, tangtangon ra usab ang bike lane? Di ba makamugna na hinuon og kalibog sa mga tawo, labina niadtong nag-bike-to-work, nga mogamit sa lane?
Wa diay ordinansa ang Mandaue City, sama sa Cebu City, nga nag-regulate sa gikusgon sa dagan sa mga sakyanan ngadto lang sa 40 kilometros matag oras sa mga highway? Utingkayon unta sa Team ang mga ordinansa kay ang traffic ordinance sa Cebu City, gikopya sa ubang mga local government unit sa Metro Cebu.
Di ba mas maayo mo-invest sa mga traffic device, sama sa speed gun, sa pagpatuman sa balaud sa trapiko kay sa mag-ekspiremento sa usa ka paagi nga angay untang ipermanente. Maora na hinuon og duwa-duwa.
Himuang permanente ang bike lane. Ipatuman ang balaud sa trapiko. Mopalit og mga ekipo sama sa speed gun nga makatabang sa traffic law enforcement kay sa mag-experiment.