GIBUHIAN na niadtong Biyernes sa buntag sa kadagatan ang pawikan nga nakit-ang napadpad sa Gilutungan Channel, Barangay Maribago, dakbayan sa Lapu-Lapu.
Ang pawikan nga nitimbang og di mominos 30 kilos nagsukod og 65 pulgada ang gidak-on, 58 pulgada ang gilapdon.
Mismong si Lapu- Lapu City Mayor Paz Radaza ang mibuhi sa pawikan nga nailhan nga usa ka Olive Ridley Sea Turtle sa Crimson Resort and Spa.
Gitataw sa City Environmental and Natural Resources Office (CENRO) nga endangered specie ang klase sa pawikan nga nakit-ang napadpad sa usa ka mananagat sa isla sa Olango.
Sa dihang gikuhaan og habig sa mga tigbalita, gibutyag ni Radaza nga kinahanglan gawmon sa mga Oponganon ang mga hayop nga makit-an nila sa kadagatan aron kini mas modaghan pa.
Saysay niya nga ang maong insidente nagpahinumdom lang nga abunda ang dakbayan sa gasa sa kinaiyahan.
Si Radaza miawhag usab sa tanang Oponganon nga kon makasugat og mga endangered specie nga hayop, i-report dayon kini ngadto sa buhatan sa Cenro aron maatiman, di mamatay ug di ibaligya sa merkado sa ubos nga presyo.
Nanghinaot usab siya nga maatiman ang ilang gibuhian nga pawikan tungod kay naghatag kini og maayong talan-awon sa kadagatan sa dakbayan ilabi na sa mga lokal ug langyaw nga turista.
Gibutyag ni marine biologist Mario Marababol nga ang maong pawikan nagpangedaron og walo hangtod siyam ka tuig ug luya kini kay gikan nangitlog.