MOKABAT sa 1,500 ka kababayen-an ang makabenipisyo sa mga pagbansay sa livelihood skills nga maoy nakalinya nga kalihokan karong semanaha sa dakbayan sa Lapu-Lapu atol sa selebrasyon sa Women’s Month.
Matod ni Jimmy Glomar, coordinator sa Lapu-Lapu City Cooperative and Livelihood Resource Center (LLCCLRC), nga sagad sa ilang mga itanyag nga pagbansay sa kababayen-an mao ang pagluto sa nagkadaiyang putahe nga dali mabuhat sa balay.
Ang training nga gitanyag sa LLCCLRC kagahapong adlawa mao ang basic haircut, manicure ug pedicure, lakip na ang paggama og embutido ug fresh lumpia.
Usa ka trade fair ang gipahigayon kagahapon sa Lapu-Lapu City Sports Complex Compound.
Gipaambit ni Glomar nga ang mga pagbansay abli sa kababayen-an gikan sa 30 ka barangay sa dakbayan.
Gani, iyang giawhag ang mga babaye sa pagsalmot sa ilang mga programa aron makatabang kini makadugang sa income sa pamilya.
“One of the Millennium Development Goals is women empowerment and gender equality. One way of achieving that is to increase the income of women,” saysay ni Glomar sa press conference niadtong Biyernes.
Gawas sa livelihood trainings, mohimo usab og gender sensitivity training and seminars on bookkeeping, marketing ug business proposal making ang dakbayan.
Ang selebrasyon sa Women’s Month sa dakbayan motapos karong Marso 28 pinaagi sa usa ka team-building ug mangrove planting sa Eco-Tourism Park sa Sitio Asinan, Barangay Sabang, Isla sa Olango.