6,000 ka pulis ipakatap sa PRO 7

KAPIN sa 6,000 ka mga pulis ang ipakatap sa Police Regional Office (PRO) 7 sa tibuok Central Visayas atol sa pagtimaan sa Semana Santa.

Sugod niadtong miaging semana gipailawom na sa full alert status ang tanang pulis sa PRO 7.

Ang mga pulis gibahinbahin sa tanang siyudad ug lalawigan ubos sa PRO 7 aron ipakatap sama sa pantalan, bus terminals, simbahan, tourist destination, malls ug uban pang lugar nga tapokanan sa mga turista.

Samtang matag lugar nga dunay daghang tawo, magbutang sila og police assistance center ug assistance desk aron maoy motu­bag kon dunay masugatang problema ang mga turista.

Andam na usab ang kapulisan sa probinsya sa ilang Oplan Semana Santa. Gani ang isla sa Bantayan nga maoy giila nga dayuhon sa mga langyaw ug lokal nga mga turista ning panahon sa mahal nga adlaw.

Matod ni Supt. Antonio Bagarinao nga niadtong mia­ging tuig nakig-alayon sila sa kapulisan sa dakbayan sa Sugbo sanglit daghan sa mga kawatan ang modayo usab sa isla aron mamiktima og mga bisita ug ila usab ning buhaton karong tuiga.

Gipahibawo sa kapulisan sa probinsya nga ilang hugot nga ipatuman ang provincial ordinance pagdili sa bikini open sa kapistahan sa isla sa Bantayan.

Sa full alert status, kini nagpasabot nga wa nay pulis nga gitugotan nga maka leave of absence ug ipa-recall kadtong naka-leave na, kini isip kabahin sa ilang hugot nga pagpangandam sa Semana Santa.

Subling nipahimangno ang kapulisan nga di mokompiyansa sa pagpanglakaw nga way mabilin sa ilang panimay sang­lit daghang mga kriminal nga mopahimulos ning panahon sa bakasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph